Tensionohet situata në Shqipëri! Opozita vijon ‘mosbindjen civile’, bllokon disa akse kombëtare..

Opozita shqiptare e udhëhequr nga Partia Demokratike, pritet të vijojë aksionin e saj të etiketuar si “mosbindje civile”, me një protestë të radhës, ku do të synojë bllokimin e disa prej akseve dhe kryqëzimeve kryesore në vend.

Skenari i përgatitur nga opozita është ai i krijimit të grupacioneve të caktuara, ku bëjnë pjesë deputetë dhe aktivistë nga forcat politike opozitare, të cilat do të jenë pjesë e protestës.

Çdo segment do të ketë në krye degët e PD në rrethe si dhe deputetët e qarkut.
Disa pika të mësuara se do të bllokohen nga ky aksion janë:
Sheshi Shqiponja, ku do të jenë të pranishme degët e Tiranës dhe qarkut Dibër, që do të bllokojnë hyrje-daljet në këtë rrugë edhe lëvizjen e automjeteve.

Deputetët që do të jenë në këtë pikë janë Flamur Noka, Albana Vokshi, Xhelal Mziu, Petrit Doda, Asllan Dogjani, Helidon Bushati, Kreshnik Çollaku, Dhurata Çupi dhe aleatët të cilët do të jenë bashkë me qytetarët.

Pika e dytë do të jetë rrethrrotullimi Milot, ku do të vendosen deputetët e qarkut Kukës, Shkodër dhe Lezhë, përkatësisht deputetët Flamur Hoxha, Isuf Çela, Emilja Koliqi, Ramadan Lika, Greta Bardeli, Ludovik Hasanaj, Lindita Metaliaj, Elda Hoti, Kastriot Piroli.

Tek rrethrrotullimi Shkozet, do të jenë degët e qarkut Durrës, Fushë-Kruja, Kruja, Shijaku.
Në rrethrrotullimin e Bradasheshit do të jenë degët e qarkut Korçë-Elbasan, me deputetët Lefter Gështenja, Qani Xhafa, Edmond Spaho, Sorina Koti, Tomor Alizoti.

Në rrethrrotullimin e Rrogozhinës, degët Kavajë, Lushnjë, Rrogozhinë dhe Divjakë me Ilda Dhorin, Dashnor Sulën, Bledjon Nallbatin.
Në rrethrrotullimin Levan, degët e Fierit, Gjirokastrës, Vlorës, Beratit, me deputetët Luan Baçi, Kasem Mahmutaj, Tritan Shehu, Bujar Leskaj.

Nga ana tjetër, deputetët e tjerë, ndër të cilët Gazment Bardhi, Agron Gjekmarkaj, Oerd Bylykbashi, Jorida Tabaku, Ina Zhupa, Zheni Gjergji dhe Saimir Korreshi, do t’i bashkohen tubimit te sheshi Shqiponja në orën 18:00, pas përfundimit të takimit të MSA-së, ku do të marrin pjesë sipas porosisë së kryetarit të partisë.

Afati i bllokimit po kështu mësohet të jetë 3 orë, nga ora 17:00-20:00.
Kreu i Grupit Parlamentar demokrat, Gazment Bardhi, ka thënë se është dërguar njoftimi edhe në Polici.

“Janë pikat kyçe të lëvizjes në Shqipëri që sjellin dhe bllokim të qarkullimit. Mbetet për t’u parë nëse policia do të marrë masa”, shtoi Bardhi.
Nga ana tjetër, Policia e Shtetit ka njoftuar se ka ndërmarrë të gjitha masat për garantimin e rendit publik gjatë tubimit të nesërm të opozitës, nga ora 17:00 deri në 20:00.

Akset rrugore që pritet të bllokohen nga opozita janë: “Tiranë–Durrës”, pranë mbikalimit të Kamzës; “Durrës-Tiranë”, pranë mbikalimit të Shkozetit; “Kashar–Milot”, pranë kryqëzimit të Milotit; “Elbasan–Tiranë”, te rrethrrotullimi i Bradasheshit; “Durrës–Fier”, te rrethrrotullimi i Rrogozhinës dhe “Levan–Tepelenë”, te rrethrrotullimi i Levanit.

Nëpërmjet deklaratës, Policia e Shtetit ka rikujtuar subjektin politik që do të organizojë protestën – Partinë Demokratike – se bllokimi i akseve rrugore është vepër penale.

Policia e Shtetit ka njoftuar sakaq, se ka ndërmarrë të gjitha masat për garantimin e rendit publik, zbatimin e të drejtave dhe lirive të qytetarëve dhe të pjesëmarrësve në tubime, si dhe mbrojtjen e pronave publike dhe private.

“Nisur nga objekti i kërkesës së bërë për zhvillimin e tubimeve në disa akse rrugore, Policia e Shtetit iu ka kthyer përgjigje organizatorëve se marrin përsipër garantimin e tubimeve që nuk bllokojnë lëvizjen e lirë të automjeteve dhe qytetarëve”, thuhet në njoftimin e policisë.

“Bllokimi i akseve rrugore është vepër penale e parashikuar nga neni 293 i Kodit Penal dhe cilido që do të ndërmarrë veprime për të bllokuar rrugët, do të përballet me pasojat që sjell shkelja e këtij neni”.

Ndërkohë, policia ka bërë me dije se për t’iu ardhur në ndihmë qytetarëve që do të qarkullojnë në akset rrugore të mësipërme, Policia e Shtetit ka ndërmarrë masa që në rast bllokimi, të devijojë qarkullimin e automjeteve në rrugë alternative.

Po ashtu qytetarët që duan të udhëtojnë drejt Rinasit, me qëllim daljen jashtë vendit, duhet që për shkak të trafikut që mund të krijohet, të arrijnë në aeroport para orës 17:00, ose të përdorin rrugët alternative për të mbërritur në kohë.

“Policia e Shtetit apelon dhe një herë për zbatim të ligjit dhe respektim të lëvizjes së lirë të qytetarëve dhe automjeteve, gjatë orarit të tubimeve”.

/koha.mk