Në Zvicrën e pasur disa njerëz janë në të vërtetë në rrezik të varfërisë..?

Zvicra është një nga vendet më të begata të Evropës, por kjo nuk do të thotë se çdo banor është i pasur. Në fakt, statistikat evropiane tregojnë të kundërtën.

Ndoshta nuk është për t’u habitur që njerëzit mendojnë për Zvicrën si vendin ku jetojnë vetëm mega të pasurit.
Në fund të fundit, në sondazhe dhe studime të ndryshme ndërkombëtare, Zvicra renditet vazhdimisht në mesin e kombeve më të pasura në botë, qoftë për sa i përket të ardhurave familjare apo aseteve individuale.

Në përgjithësi, sipas Zyrës Federale të Statistikave (FSO), “standardi i jetesës në Zvicër mbetet një nga më të lartat në Evropë. Kjo do të thotë se pavarësisht niveleve të larta të çmimeve në Zvicër, gjendja financiare e popullsisë, pas zbritjes së shpenzimeve të detyrueshme, është e më komode se ajo e vendeve fqinje dhe vendeve në Bashkimin Evropian”.

Megjithatë, Zvicra ka njerëz që jetojnë nën pragun e varfërisë, transmeton albinfo.ch.

Një studim i FSO tregon se 8.7 për qind e popullsisë jeton në varfëri, e cila përkufizohet në Zvicër me 2279 franga në muaj mesatarisht për një person të vetëm dhe 3.976 franga në muaj për dy të rritur dhe dy fëmijë. Këto pragje, të dytat më të lartat në Evropë pas Luksemburgut, janë përshtatur për fuqinë blerëse.

Krahasimi rajonal
Më shumë dritë mbi varfërinë në Zvicër hedh një studim i ri evropian, i cili zbulon se cilat rajone zvicerane janë më të prekura nga varfëria.
Studimi tregon se shkalla e Ticino-s është më e larta në Zvicër, me 27.9 për qind të popullsisë vendase në rrezik të varfërisë, shkruan thelocal.

Më pas është e ashtuquajtura Rrafshnalta Qendrore, e cila shtrihet nga liqeni i Gjenevës në jugperëndim deri në liqenin e Konstancës në verilindje. Aty janë të prekur 22.1 për qind e banorëve.

Kjo normë është 18.8 për qind në zonën e Liqenit të Gjenevës dhe 18.9 në pjesën lindore të vendit. Në zonën e Cyrihut, 14.7 për qind janë në rrezik të varfërisë dhe 12.6 për qind në Zvicrën qendrore.

Si krahasohen shifrat e varfërisë së Zvicrës me pjesën tjetër të Evropës?
Sipas një studimi tjetër evropian, mesatarja e BE-së e popullsisë në rrezik është 21.4 për qind.
Midis shteteve fqinje, ky nivel është rreth 23 për qind në Itali, 21 për qind në Gjermani, 20 për qind në Francë dhe rreth 18 për qind në Austri.

Kush janë të varfërit në Zvicër?
“Rreziku i varfërisë përcaktohet kryesisht nga rrethanat familjare dhe niveli i arsimimit”, sipas FSO.
Ky grup përbëhet kryesisht nga familje me një prind, njerëz pa arsim apo trajnim përtej shkollimit të detyrueshëm, beqarë nën 65 vjeç pa fëmijë dhe që jetojnë vetëm, si dhe emigrantë.

Çfarë ndihme është në dispozicion për të varfërit?
Çdo banor i ligjshëm i Zvicrës që jeton nën kufirin zyrtar të varfërisë ka të drejtë për një lloj asistence sociale.
Më e zakonshme është mirëqenia, sasia e së cilës varet nga rrethanat individuale. Rreth 3.2 për qind e popullsisë së Zvicrës kanë marrë “ndihmë sociale në formën e një përfitimi financiar në të paktën një rast” në vitet e fundit, sipas FSO.

“Rreziku i varësisë nga ndihma sociale është më i madh për grupe të caktuara të popullsisë si fëmijët, shtetasit e huaj, personat e divorcuar dhe ata pa arsim pas detyrueshëm. Shkalla e ndihmës sociale financiare është më e lartë në rajonet urbane dhe rritet paralelisht me madhësinë e komunës”, theksoi FSO.

Mes atyre grupeve, të huajt janë ata që përfitojnë më shumë.
Për më tepër, primet e sigurimit shëndetësor si dhe qiratë për njerëzit me të ardhura të ulëta ose familjet me shumë fëmijë mund të reduktohen nëpërmjet subvencioneve federale dhe kantonale.

/albinfo