Gjermania fut kontrollet e kufijve zyrtarisht nga 16 shtatori! Shkak azillantat

Nga dita e hënë, me 16 shtator, Gjermania do të kontrollojë kufijtë e jashtëm me të gjitha vendet fqinje. Ministrja e Brendshme, Nancy Faeser, tha se kontrollet janë të përkohshme, por të domosdoshme, për shkak të “migrimit ilegal”.

Ky vendim erdhi pas sulmit të dyshuar terrorist islamik me thikë në Solingen dhe disa sulmeve të tjera. Ministrja tha se kontrollet do të kufizojnë migrimin dhe “të mbrojnë kundër rreziqeve akute që vijnë nga terrorizmi islamik dhe krimi i rëndë”.

Zona Shengen në parim mundëson lëvizjen e lirë, por në raste të caktuara shtetet anëtare lejohen të vendosin kontrolle kufitare, nëse besojnë se ekziston një kërcënim për rendin publik ose sigurinë e brendshme.

Kontrollet që hyjnë në fuqi nga e hëna, 16 shtator, janë të përkohshme, por do të prekin të gjithë udhëtarët që hyjnë ose dalin nga Gjermania në rrugë tokësore, ajrore apo detare, që do të thotë se kontrollet do të shtohen në të gjitha pikëkalimet kufitare.

Kjo do të thotë se ndonjëherë mund të ketë edhe pritje në kalimet kufitare si në rrugë, ashtu edhe në hekurudha, e kontrolle më të forta do të ketë edhe në aeroporte. Për ata që nuk e dinë, të them se Gjermania kufizohet me Austrinë, Belgjikën, Republikën Çeke, Danimarkën, Francën, Luksemburgun, Holandën, Poloninë dhe Zvicrën, pra të gjithë udhëtarët që vijnë nga këto vende në Gjermani mund të kontrollohen.
Qeveria gjermane ka planifikuar që këto kontrolle të aplikohen gjashtë muaj, por ato mund të zgjaten, varësisht nga nevoja.

/albinfo