Kryetari Fatmir Dehari me mesazh për Mërgimtarët

Të dashur mërgimtarë, të nderuar qytetarë të Kërçovës,
Me zemër të ngrohtë dhe me mirënjohje të thellë ju drejtohem sot, ndërsa i përcjellim mërgimtarët tanë që edhe këtë verë na e zbukuruan vendlindjen me praninë e tyre.

Ishte një kënaqësi e madhe për ne që ju patëm pranë gjatë këtyre ditëve, duke rikthyer frymën e bashkimit, dashurisë dhe krenarisë për vendlindjen tonë të përbashkët.

Ardhja juaj në Kërçovën tuaj dhe tonën është më shumë se thjesht një vizitë – është një akt dashurie dhe përkushtimi që e forcon lidhjen tuaj me këtë tokë, që kurrë nuk e harroni. Ju, të dashur mërgimtarë, me praninë tuaj, e ktheni Kërçovën në një vend të gjallë, të hareshëm dhe plot energji pozitive. Çdo rrugë, çdo shesh dhe çdo shtëpi ndjen përkëdheljen e një dashurie të sinqertë që buron nga thellësitë e zemrës suaj për vendlindjen.

E dimë që çdo kthim në vendlindje është një moment i veçantë, plot emocione dhe kujtime. Për ne, prania juaj është një dhuratë e çmuar, e cila jo vetëm që na ngroh zemrat, por edhe gjallëron ekonominë tonë lokale. Me ju, dyqanet, kafet dhe tregjet e Kërçovës marrin një jetë të re, duke përjetuar një lëvizje që sjell gëzim dhe shpresë për të gjithë.

Largimi juaj është gjithmonë një moment i ndjeshëm për ne, por ne e dimë se rrugët e Kërçovës do të mbeten gjithmonë të hapura për ju. Përtej çdo kufiri dhe largësie, dashuria juaj për vendlindjen është ajo që na bën të ndjehemi të bashkuar si një familje e madhe.

Uroj që kudo që të shkoni, të keni shëndet, suksese dhe gjithmonë të mbani Kërçovën në zemër. Ju presim sërish me krahë hapur, duke besuar që sa herë të ktheheni, do ta gjeni qytetin tonë edhe më të bukur, edhe më të përparuar.
Faleminderit për dashurinë tuaj, për përkushtimin dhe për gjithçka që bëni për këtë vend. Udhëtim të mbarë dhe shihemi sërish!

Me respekt dhe mirënjohje,
Shkruan kryetari i Kërçovës Fatmir Dehari në facebook

/ms