Arrestohen 3 persona për zjarrvënie të qëllimshme..

Tre personave u është caktuar paraburgim 8 ditorë pasi Prokuroria ka hapur hetim për zjarrvënie të qëllimshme. Sipas njoftimit të organit të akuzës, një person bashkë me dy djemtë e tij më 9 gusht të këtij viti, duke përdorur lëndë djegëse kanë shkaktuar zjarr në fshatin Patishka Rekë të Shkupit. Me të njëjtën, kanë vënë në rrezik të përmasave të mëdha jetën dhe pronën e banorëve dhe do të ndiqen për vepër penale e cila parashikon dënim me burg prej 6 muaj deri në 5 vjet.

“Me çakmak kanë djegur pyll me kërcell të ulët dhe barishte të thata. Toka e djegur është në pronësi shtetërore, ndërkaq ka ekzistuar rreziku që zjarri të shpërndahet me të madhe në zonën e pyllit me kërcell të ulët dhe kërcell të thatë, madje edhe të përfshijë një pjesë të Parkut Kombëtar “Jasen”. Të dyshuarit i ka parë një kalimtar, ndërkaq zyrtarët policorë i kanë kapur dhe tek ata kanë gjetur një sasi të konsiderueshme të lëndës djegëse të cilën e kanë shfrytëzuar për shkaktimin e zjarrit. Zjarrfikësit kanë intervenuar që ta fikin zjarrin”, thonë nga Prokuroria Themelore Publike.

Derisa shteti përballet me situatën serioze të zjarreve, gjatë muajit gusht, autoritetet policore kanë njoftuar edhe për katër raste të tjera.
Më 5 gusht, një 54-vjeçar nga Prilepi, u arrestua nga zyrtarët policorë pasi në fshatin Shtavicë ka shkaktuar zjarr, duke djegur bar në oborrin e shtëpisë së tij, pas çka zjarri është shpërndarë në parcelat e fqinjëve. Personi, është kapur nga zyrtarët policor dhe e ka pranuar veprën.

Më 7 gusht, zyrtarët policor në Veles arrestuan një 50-vjeçar nga fshati Oreshë i Komunës së Çashkës nën dyshimin se ka shkaktuar zjarr nga i cili është djegur një sipërfaqe të madhe e pyllit me kërcell të ulët. Policia e ka kapur në vendin e ngjarjes gjatë fikjes së zjarrit dhe ia ka gjetur mjetet me të cilat është shkaktuar zjarri. 50-vjeçari e ka pranuar veprën.

Pos këtij rasti, në Çashkë të Velesit ka evidentuar edhe një rast tjetër, 2 ditë më vonë, kur një 84-vjeçar ka shkaktuar rrezik të përgjithshëm në fshatin Omoran. Sipas informatave të policisë, 84-vjeçari ka djegur barin e thatë në oborrin e shtëpisë së tij, ndërkaq si pasojë ka pësuar djegie në trup, të cilat i janë konstatuar në Spitalin e Përgjithshëm të Velesit.

Për zjarrvënie ndiqet edhe një 57-vjeçar nga Prilepi, për të cilin, Policia e Makedonski Brodit e ka paraqitur se ka shkaktuar “zjarr pyjor”, vepër e cila sipas Kodit Penal është e dënueshme prej minimalisht 3 vjet burg.

I paraqituri, ka shkaktuar zjarr në ambient të hapur në fshatin Sllatinë dhe Greshnicë të Makedonski Brodit, pas çka janë shkaktuar zjarre të një sipërfaqe të madhe ku janë djegur barishte dhe pyje me kërcell të ulët. Zyrtarët policorë, të paraqiturin e kanë kapur në vendin e shkaktimit të zjarrit dhe gjatë kontrollit i janë gjetur mjetet me të cilat e ka kryer veprën për të cilën më pas në stacion policor e ka pranuar.

Derisa policia është në ndjekje të personave të cilët shkaktojnë zjarre, situata në terren me fikjen e zjarreve është serioze.
Sipas Qendrës për Menaxhim me Kriza, gjatë ditës së djeshme ka pasur gjithsej 42 zjarre në ambient të hapur, prej të cilave momentalisht 6 janë aktive, 5 janë nën kontroll dhe 31 janë fikur.

/alsatm