VV natë speciale me mërgatën, Kurti: Nuk ka kush që na ndan..

Kosova ka mijëra aleatë e partnerë, por nuk e ka ndihmën dhe mbështetjen sikur të mërgatës që ndodhet jashtë dhe brenda kombit.
Kështu është shprehur kryeministri i Kosovës Albin Kurti në organizimin e veçantë për mërgatën nga partia që ai drejton, Lëvizja Vetëvendosje, sonte me temën “Lëvizja me mërgatën”.

I pari i Qeverisë ka ftuar diasporën të vizitojnë Kosovën sa më shpesh që munden dhe të lidhen me njëri-tjetrin, duke thënë se “nuk ka kush që t’i ndajë.”
Fjalët thumbuese ndaj qeverive të kaluara nuk munguan as në këtë takim nga kryetari i Lëvizjes Vetëvendosje.

“Edhe vera ka qenë dimër. Buxheti i shtetit zhvatej. Në vend se të punohet toka bujqësore, privatizohej për centë”, tha Kurti.

Ndërkohë që presidentja Vjosa Osmani pritet të shpallë datën e zgjedhjeve të rregullta, kryeministri Kurti u ka treguar të pranishmëve se ku mund të votojnë.
“E kemi mundësuar votimin ndërmjet ligjit që për zgjedhje mund të votoni qoftë me postë, në ambasada apo KQZ”, ka thënë ai.

Një qytetar nga mërgata i pranishëm në këtë takim, Zylfi Ademi e konsideron kryeministrin si shpëtimtar të kombit. Një tjetër qytetar që u identifikua vetëm me emër, ka theksuar se ka pritur kryeministrin “t’iu tregojë në këtë tubim se si do të veprohet tutje.”

/ina