Mickoski: Ka indikacione për krim epik të LSDM-së dhe BDI-së..

Krim i përmasave epike dhe keqpërdorim i shumave të mëdha të parave nga disa institucione nga pushteti i kaluar janë akuzat e kryeministrit Hristijan Mickoski në një intervistë për të përjavshmen “Fokus”.

Si shembull i keqpërdorimeve të tilla, Mickoski tregon projektin për ndërtimin e Korridorit 8 dhe 10-d, për të cilin thotë se është keqpërdorur buxheti i shtetit dhe nuk ka zbatim në terren. Ai akuzon gjithashtu se në arkën e shtetit mungojnë dhjetëra milionë euro për pagesën e pensioneve.

“Nëse keni mungesë prej 5 miliardë denarësh, që janë më shumë se 80 milionë euro, për të paguar pensionet e rregullta, e kam fjalën për pensionet e rregullta, pa ato harmonizimet 2 herë në vit sipas ligjit, pa ngritjet. Dhe, kur shihni në disa institucione të tjera, ku financohen projekte të caktuara, të cilat ishin të një rëndësie thelbësore para së gjithash për BDI-në, por edhe për LSDM-në, atëherë arrini në përfundimin se dikush këtu me vetëdije e ka keqpërdorur buxhetin për financimin e projekteve, përmes të cilave ka dyshime të arsyeshme se paratë janë keqpërdorur. Në terren nuk shohim realizimin dhe përparimin e atyre projekteve. Fillimisht po mendoj për projektet që kanë të bëjnë me ndërtimin e Korridorit 8 dhe 10-D”, deklaroi Hristijan Mickoski, kryeministër.

Mickoski po ashtu akuzon se në institucionin “Pyjet Nacionale” mungojnë më shumë se 8 milionë euro, borxhe për të cilat pretendon se faturat kanë qenë dy ose tre herë më të mëdha se zakonisht. Kryeministri tregon keqpërdorime edhe në TEC Manastir, ku thotë se marrëveshjet për shitjen e xehes janë lidhur me një diferencë prej rreth 40 milionë euro. Sipas tij, këto dyshime duhet të jenë objekt i Prokurorisë dhe organeve të drejtësisë, edhe pse ai vetë e pranon se ka ende korrupsion në këtë sferë.

“Ka gjykatës dhe prokurorë që janë të lidhur familjarisht, por jo të gjithë, një pakicë. Ka nga ata që janë të korruptuar, por jo të gjithë, por janë pakicë. Ka nga ata që i kanë mbajtur lëndët në sirtar dhe nuk i kanë procesuar, por janë pakicë. Shumica nuk mund t’i nënshtrohet pakicës.

Pakica do të katalizojë veten, do të filtrohet dhe do të jetë e pazëshme. Për fat të keq, pakica tani është në pozita kyçe dhe për këtë na duhet kjo shumicë për ta mposhtur pakicën, duke zgjedhur ata vetë atë që mendojnë u duhet. Këtu nuk do të ndërhyjmë, do të rrimë mënjanë dhe do t’i lëmë ta bëjnë vetë atë katarsë, të filtrohen dhe të hedhin poshtë të keqen nga sistemi”, tha Hristijan Mickoski, kryeministër.

Mickoski theksoi se gjyqësori është i pavarur, por tregoi se mbikëqyrja e funksionimit të këtyre institucioneve mund të bëhet përmes një komisioni në Kuvend, i cili do të përbëhet nga deputetë të qeverisë dhe opozitës dhe do të monitorohet puna e tyre përmes kontrolleve të rregullta dhe të jashtëzakonshme.

/Alsat.mk