Dr. Kujtim Kasamit publikon librin më të ri “Ndryshimet shoqërore dhe globalizimi”

Studimi i Dr. Kujtim Kasamit “Ndryshimet shoqërore dhe globalizimi” është përmbledhja serioze e koncepteve, qasjeve dhe aktorëve të globalizimit, përmes së cilave globalizimi si proces merr formë si përmbajtje shkencore dhe si fushë studimi. Literatura në gjuhën shqipe për studimin e ndryshimeve shoqërore dhe globalizimin është e varfër dhe ky studim e pasuron debatin, por edhe fjalorin akademik brendashqiptar për këto çështje.

Meqenëse, globalizimi ka të bëjë si me shpërndarjen e burimeve materiale dhe simbolike ashtu edhe me veprimet apo mosveprimet e qëllimshme të autoriteteve qeverisëse, kjo fushë studimi është shumë e rëndësishme për shoqëritë në tranzicion, përfshirë këtu Maqedoninë e Veriut. Për faktin se e shndërron debatin publik nga një debat formal në një debat përmbajtjesor për opsionet më të mira për realizimin e së mirës dhe ndryshimeve shoqërore.

Ky libër nuk duhet të lexohet vetëm nga studentët dhe studiuesit e shkencave humane. Teknikat, metodat, qasjet teorike dhe modelet e shtjelluara në këtë libër duhet të lexohen, analizohen dhe përdoren edhe nga organizatat hulumtuese që merren me analiza të ndryshimeve shoqërore dhe globalizimin, por edhe nga aktorët vendimmarrës e politikbërës. Përpilimi i këtij libri, ka ardhur si rezultat i nevojës dhe përpjekjës së kahershme, që të kontribuohet në kuptimin, studimin dhe përmirësimin e politikave publike dhe të globalizimit.

Veçanërisht për shtetet dhe shoqëritë në tranzicion, ku mjaft sipërfaqësisht diskutohen dhe analizohen pndryshimet shoqërore, e aq më pak mirëfilli krijohen veprime të duhura publike lokale dhe globale. Kur i shtohet kësaj edhe nevoja e plotësimit të boshllëkut të literaturës në gjuhën shqipe për studentët dhe studiuesit e rinj në një fushë specifike, siç është globalizimi dhe hulumtimi i ndryshimeve shoqërore, atëherë kjo përpjekje del thuaja si imperativ i kohës.

Në përgjithësi si çdo disiplinë shkencore edhe shkenca politike, dhe në veçanti studimi i globalizimit, kërkon fillimisht njohjen e koncepteve dhe modeleve thelbësore si dhe ngritjen e aftësive analitike e kritike të kësaj fushe hulumtuese. Kjo vlen veçanërisht për analizat e ndryshimeve shoqërore, poashtu edhe globalizimin, fushë kjo hulumtuese që synon të pajisë studiuesit me kuadrin analitik, njohuritë dhe qasjet themelore për studimin dhe zhvillimin e duhur dhe të mëtejshëm të kësaj fushe studimore.

Mungesa e theksuar e literaturës përkatëse, studimeve dhe analizave shkencore në këtë disiplinë, relativisht të re në këto treva, është edhe një faktor tjetër shtesë që pamundëson konsolidimin e zhvillimin e mirëfilltë të kësaj fushe shkencore. Shpresoj se ky libër, do të kontribuoj sadopak në drejtim të avancimit të saj. Në këtë libër do të shtjellohen dimensionet kryesore në studimin e ndryshimeve shoqërore dhe globalizimin, siç është trajektorja historike dhe zhvillimi i disiplinës, raportet me fushat dhe nën-fushat kryesore të studimit të saj si dhe shumë aspekte thelbësore lidhur me globalizimin dhe qeverisjen globale.

Ky libër përpiqet të njoftoj e udhëzoj lexuesit dhe studiuesit me konceptet themelore të globalizimit, diskutimin e rëndësisë së tyre në të kuptuarit e çështjeve politike, duke ndërlidhur konceptet teorike me modelet e ndryshme të analizimit dhe aplikimit të tyre. Libri është shkruar jo vetëm për të përshkruar dhe ofruar informata rreth kësaj fushe apo aspekteve kryesore të saj, por edhe të nxitë mendimin e pavarur dhe kritik. Gjithashtu, synon që të sfidojë lexuesit me çështje për të cilat ata do të duhej të thellohen tutje në analiza dhe në gjetjen e argumenteve shkencore.

Zhgënjimi nga mungesa e njohurive konceptuale, shkathtësive analizuese, por shpesh edhe vullnetit të mangët të politikbëresve që të përfshijn ekspertizën shkencore, e kanë nxitur autorin që t’i përvishet një pune aspak të lehtë. Qëllimi tjetër dhe shtesë, është që kjo fushë studimi të njihet më shumë e më mirë. Sikurse, të ndikoj në krijimin e ekspertizës, aq shumë të nevojshme për zhvillimin e shtetit dhe politikave të tij, veçanërisht të një shteti siç është Republika e Maqedonisë së Veriut.

Publikimet, kërkimet shkencore dhe punimet e shumta, që janë çdo herë e më të avancuara dhe më të profilizuara në sektorë, raste dhe vende të ndryshme, më motivuan edhe më shumë që të bëj një kontribut, sado modest, në hapjen e shtigjeve të reja në zhvillimin e kësaj fushe studimore. Me qëllim të leximit dhe studimit sa më të përshtatshëm, referimi dhe citimi është në stilin që mundëson përqendrim dhe lexim më të rrjedhshëm të tekstit, si dhe konsultim të mundshëm të burimeve në fund të librit.

Duke u nisur nga këshilla e Einstein-it se; “Çdo gjë duhet të bëhet aq e thjeshtë sa të jetë e mundur, por jo krejtësisht e thjeshtuar”. Është bërë përpjekja, aq sa ishte mundur, të shmanget përdorimi i termeve teknike dhe atyre të huaja, me qëllim që gjuha të jetë lehtësisht e kuptueshme dhe potencialisht e shqipëruar. Sidoqoftë, disa nga nocionet, konceptet apo emërtimet mbesin të pandryshuara apo vihen në kllapa në gjuhen e tyre origjinale, me qëllim që të mos humbin në autenticitetin e domethënies dhe kuptimit që kanë. Për ketë arsye, edhe emrat e autorëve dhe studiuesve të huaj, do të mbesin në formën e tyre origjinale.

/ms