Së shpejti në duart e lexuesit një vepër kapitale mbi këngën burimore kërçovare nga Bexhet Jagodini

Me profesorin dhe bilbilin e këngës burimore kërçovare, z. Bexhet Jagodini, para ca muajsh më rastisi të uleshim të pinim një kafe. E njihja nga interpretimet e tij maestrale të këngëve burimore kërçovare, por fizikisht nuk ishim takuar kurrë. Në të e sipër i thashë, që jam adhurues i flaktë i këngës burimore kërçovare dhe kësisoj, filluam të diskutonim për vlerat tona si krahinë, në veçanti për muzikën dhe folklorin. U mahnita nga diapazoni i gjerë i tij në këtë fushë.

E vërejta se ai nuk ishte vetëm një këngëtar, por edhe një njohës dhe studiues jo vetëm i këngës burimore kërçovare, por edhe i folklorit tonë autentik, si në aspektin gjuhësor ashtu edhe sa u përket traditave, dokeve dhe zakoneve.

Bexheti më tregoi për projektin e tij jetësor, për përmbylljen e një monografie, që ai e titullon: KËNGA KËRÇOVARE – SHTYLLA E KËNGËS SHQIPTARE, voluminoze në sasinë e materialit që trajton (mbi 300 faqe, format B5), por tepër cilësore sa i përket specifikës tematike. Shkaku i interesit tim intensiv për folklorin tonë, duke ngjizur tezën se folklori kërçovar, por edhe i krahinave tjera, mund të zbërthejë autoktoninë dhe lashtësinë e gjuhës shqipe, ramë dakord që të bashkëpunojmë për projektin e tij kaq madhor dhe fisnik.

Bexheti, me modestinë e tij të jashtëzakonshme, më falënderoi, por edhe më luti që t’i rrekesha punës me kujdes. “Rri rehat, i nderuar”, ia ktheva unë. “Me këtë rast, nuk bëhet fjalë për Bexhetin si individ, por për vlerat që ky tekst do të sjellë sa i përket historikut të këngës burimore kërçovare, veçantisë dhe rëndësisë së saj në arealin muzikor të shqipes në përgjithësi”.

Ndërkohë duke e shfletuar dhe redaktuar atë, hasa në një korpus të mahnitshëm të identitetit tonë gjuhësor, muzikor dhe folklorik. Atë që e pandeh unë, se hulumtimi i folklorit do ta përforcojë të vërtetën mbi lashtësinë e gjuhës shqipe, duke hulumtuar sidomos në korpusin gjuhësor të Kërçovës me rrethinë, njëjtë edhe Bexheti flet për zanafillën e këngës burimore kërçovare, e cila i ka dhënë dhe po i jep shumë spektrit muzikor mbarëshqiptar.

Kjo monografi e këngës kërçovare, e para e këtij lloji në këtë format, paraqet një enciklopedi të muzikës shqipe, e cila nuk përfshin vetëm Kërçovën me rrethinë, por mbarë trojet shqiptare dhe ajo ofron një platformë të mirëqenë kombëtare për vlerat tona të gjithmbarshme muzikore e folklorike.
Shkruan Prof. Dr Arbër Çeliku

/ms