Lidhja e Diasporës së Bashkuar Kërçovare thirrje për mobilizim dhe votimin e VLEN

Me rastin e mbajtjes së zgjedhjeve parlamentare dhe presidenciale në Maqedoninë e Veriut, institucionet e shtetit janë mobilizuar që të sensibilizojnë bashkathetarët për të votuar në Diasporë. Dhe për këtë kanë përpiluar një formular për t’u regjistruar të votojnë.

Me ndryshime të vogla ky është po ai i njëjti formular i cili është përdorur për të bërë regjistrimin e popullsisë në Diasporë. Dhe, ky formular është po aq diskriminues për shqiptarët për këto arsye:

1. Aty kërkohet që votuesi të deklarojë përkatësinë e tij kombëtare dhe kështu institucionet, t’i shlyejnë shqiptarët nga listat zgjedhore në Vendlindje, si fazë e parë drejt shlyerjes së dokumenteve të tyre të identifikimit.

2. Aty kërkohet që votuesi të deklarojë shtetin, lagjen dhe adresën ku punon dhe jeton përkohësisht dhe kështu institucionet të bëjnë “pastrimin” e regjistrave zgjedhorë dhe regjistrave të tjerë si fazë e parë drejt ngrirjes dhe pastaj shlyerjes së adresave në Vendlindje. Pra, që mos të kemi adresë në Vendin tonë. Mos të kesh adresë do të thotë mos të kesh vend në Vendin tënd.

3. Aty kërkohet që votuesi të dëshmojë se të dhënat e kësaj deklarate (prijava), janë të sakta dhe deklaruesi mbahet përgjegjës për vërtetësinë e tyre. Pra kjo nuk është kërkesë për regjistrim por deklaratë e vullnetshme banimi jashtë Vendlindjes dhe, në mënyrë indirekte, kërkesë për shpërngulje.
Në përkthim kjo do të thotë se me vullnet dhe vetëdije të plotë, edhe zyrtarisht, Diaspora braktis Vendlindjen. Gjenerata jonë nuk mund ta bëjë këtë sepse do të na mallkojnë brezat në vijim.

Cila është zgjidhja? Në Diasporë mos aplikoni dhe verifikoni listat zgjedhore në Vendlindje!
Të nderuar bashkatdhetarë në Diasporë dhe bashkëvendës në Vendlindje,
Zgjedhjet që vijnë, në Maqedoninë e Veriut, nuk janë zgjedhje të rëndomta por janë zgjedhjet më të rëndësishme në tridhjetëvjeçarin e fundit për të sotmen dhe të nesërmen e Vendlindjes dhe Diasporës.

Këto zgjedhje duhet të sjellin ndryshimin dhe t’u heqin mundësinë, për të plaçkitur e zbrazur Vendlindjen nga bashkëvendësit dhe penguar kthimin e bashkatdhetarëve nga Diaspora, atyre forcave që ia grabitën mandatin, në disa zgjedhje, sovranit për t’i përfaqësuar.
Momenti është sa historik aq edhe dramatik në fillim për Vendlindjen, pastaj edhe për Diasporën.

Prandaj nga ne, Diaspora, kërkohet që të bashkohemi me Vendlindjen dhe të votojmë NDRYSHIMIN, të gjithë së bashku, në Vendlindje, jo në Diasporë.
Lidhja e Diasporës së Bashkuar Kërçovare fton të gjithë bashkatdhetarët dhe organizimet në Diasporë të mobilizojnë Diasporën, të vijë për të votuar në Vendlindje dhe të ndikojmë në sjelljen e NDRYSHIMIT.

/ms