Mësuesit – poezi nga prof. Nazif Selimi

( Poezi kushtuar Mësuesit Pertef Abaz Therepeli- skraparliut që kreu misionin e mësuesisë në fshatin Jagoll, nga viti 1942, deri në ditën e fundit të jetës së tij, në vitin 1972. Sot trupi i tij prehet në vendprehjen e fshatit Jagoll të Kërçovës. Jagollasit dhe fshatrat përreth tij, si edhe mbarë Kërçova kanë respektin më të lartë për këtë misionar të arsimit të parë në gjuhën shqipe në këtë skaj të Ilirisë.

Mësues Pertefi ishte pjesë e kontingjentit të mësuesëve shqiptarë, që nën drejtimin e Ernest Koliqit, u shpërndanë në trojet shqiptare, të mbetura nën mbretërinë jugosllave, që të hapin shkolla e me misionin e mësuesisë të ndriçonin shpirtin shqiptar. Pjesa më e madhe e këtyre mësuesëve, pas vitit 1945 u kthyen në Shqipëri, ndërsa Mësues Pertefi dritëroi deri në ditën e fundit të jetës së tij në Jagoll të Kërçovës.

Për kontributin e Tij, Mësues Pertefit, nga drejtoria e Shkollës Fillore ,, Naim Frashëri‘‘ të f. Jagoll, më 22 nëntor 2018, u nderua me titullin-Mësues i Popullit. Poashtu më 22 nëntor 2018, nga Kryetari i komunës së Kërçovës Fatmir Dehari, u nderua me titullin -Qytetar Nderi dhe gjithashtu më 24 nëntor2018, nga Bashkia e Skraparit nderohet me -Certifikatë Mirënjohjeje )

MËSUESIT
Ç‘u shkëput një yll nga qielli
E po zbret në Therepel
Në gji t‘nënës e djep thanash
Në mes lisash në mes zanash

Rriti nëna një petrit
U bë yll që dhuron dritë
Flakë Tomorri nxjerrë nga stralli
Ky petrit digjet nga malli
Për motra t‘veta e v‘llazëri
Pa drit‘dielli nën krajli
Jo, tha, nën‘ këtu s‘ mund të rri
Se e kam një cop‘ Shqipëri
Ku mbretëron një terr i zi

Hapi krahët Uskanë kreshnike
Hapi krahët Dardani
Po vijnë shqipet yje drite
Sjellin diell e liri

Dhe Pertef‘i Therepelit
Në Jagoll ngriti folenë
Ky vullkan e rreze drite
Kjo kala me bedenë

Flakëroi si qiriri
Tridhjetë vjet e s‘u sos kurrë
Sot mbretëron me lavdinë
N’gur mermeri me flamur

Nazif S. Selimi, ish nxënës i Mësuesit Pertef Therepeli Jagoll, 30.12.2023

/ms