Thirrje popullit shqiptar në RMV – nga Prof.Dr. Arbër Çeliku
Për dëmet kombëtare tonat që i shkaktuan hordhitë politike në demokraci, kam shkruar rreth dy dekada dhe janë të publikuara në faqen time të Facebookut, por edhe nëpër media dhe portale online.
Kësaj radhe dua t’ju inkurajoj:
1. Ta mposhtni frikën, të mos bini pre e shantazheve se do t’ju nxjerrin nga puna, se e drejta e punës është e drejtë kushtetuese. Për më tepër, përmes punësimeve tuaja, këta janë arsyetuar me përfaqësimin numerik të shqiptarëve në RMV para Unionit Evropian dhe SHBA-ve, kanë ndenjur në pushtet dhe janë pasuruar. Ky ka qenë i vetmi aset i tyre.
2. Mos bini pre e propagandës se ndonjë shqiptar profesionist në fushën e vete dhe humanist i pashoq, mund të jetë me VMRO-në dhe prorus, se këta për 1 dekadë kanë qenë paterica e VMRO-së.
3. Mos lejoni që t’ju shtijnë në vëllavrasje si dikur, se këta për interesa personale, në fund edhe me dreqin bëjnë pakt.
4. Orientimi politik është bindje personale dhe mos hezitoni të mbështetni atë që ju thotë mendja se është më i miri.
5. Mendoni kush ua zbrazi shkollat, kush ua degradoi shëndetësinë, kush ngriti sherifët lokalë, kush ju varfëroi dhe kush ua denigroi qenien tuaj dhe do ta keni të qartë, se ku duhet të orientoheni për një të ardhme më të mirë dhe dinjitet kombëtar.
6. Analizoni mirë e mirë profilet e politikanëve në skenën tonë politike dhe orientohuni tek më i miri.
7. Mos bini pre e manipulimeve mediatike të afërta me pushtetin. Ata montojnë situata, inskenojnë, përndjekin dhe përgjojnë kundërshtarët e tyre politikë.
8. Jini vigjilentë se do t’jua vrisni të ardhmen fëmijve tuaj, nëse mbështesni hordhitë e së ligës.
9. Mos e përsërisni gabimin e dy dekadave që lamë pas.
10. Orientohuni nga e ardhmja dhe jepini fund së keqes, që tashmë është kthyer në kancerin tonë kolektiv.
/ms
