Ja sa mijë mërgimtarë mund të kthehen në shtëpi për shkak të pasaportave që u del afati..!
Mijëra të rinj që punojnë jashtë vendit mund të detyrohen të kthehen në vendlindje sepse pasaportat e tyre me emrin e vjetër Republika e Maqedonisë nuk do të jenë të vlefshme.
Këto dokumente udhëtimi bëhen të pavlefshme pas datës 12 shkurt 2024, sepse sipas Marrëveshjes së Prespës qytetarët duhet të pajisen me pasaportat e reja Republika e Maqedonisë së Veriut.
Agjencitë e Ndërmjetësimit për punë jashtë vendit deklaruan për televizionin “Telma” se rreth 24 mijë mërgimtarë apo qytetarë në diasporë duhet të kthehen dhe të ndërpresin angazhimet e tyre të punës.
Nga viti 2021, pasaportat lëshohen përmes zyrave diplomatike-konsullore, ku janë lëshuar mbi 50 mijë dokumente udhëtimi. Ministria e Brendshme dhe ajo e Punëve të Jashtme hapën nëntë stacione bazë dhe gjashtë stacione celulare për pasaportat për emigrantët tanë.
Tani për tani, mërgimtarët po kërkojnë përgjigje në grupet e facebook dhe është e pasigurt se si do t’ia dalin, pasi që nuk ka termine të lira për nxjerrjen e pasaportave të reja. Megjithatë qytetarët që jetojnë dhe punojnë jashtë vendit duhet të informohen më detajisht në ambasadat e Maqedonisë së Veriut.
/(INA)
