Për 10 ditë skadon marrëveshja Kërçovë – Ohër..? (VIDEO)

Edhe pse paraprakisht ministri i Transportit dhe Lidhjeve Bllagoj Boçvarski ka premtuar se do ta përfundojë autostradën, dje në KlikPLus në TV21, nuk deshi të specifikojë se kur mund të jetë gati edhe pse kontrata me kompaninë kineze Sinohidro skadon deri në fund të muajit.

“Ajo që në fakt po ndodh në terren, kemi 11 rrëshqitje të dheut që kanë ndodhur në periudhën e kaluar. Ka defekte teknike të natyrës teknike, të natyrës projektuese dhe ato gabime që përsëriten me rrëshqitje, me pjerrësi të reja janë teknike dhe të natyrës projektuese. Kështu që kushdo që ka bërë gabim, që ka bërë lëshim të caktuar, do të mbajë përgjegjësi”, tha Boçvarski.

Boçvarski foli edhe për autostradën Shkup-Bllacë, projekt që po ashtu po zgjat shumë kohë dhe u rrit edhe çmimi i tij. Kjo autostradë duhet të lidhë dy kryeqytetet, Shkupin dhe Prishtinën. Boçvarski tha se projekti po përparon.

“Aty kemi një progres të mirë të punimeve në fazën e parë dhe është shpallur tenderi për aksin e dytë, i cili është shumë kompleks dhe në terren shumë të vështirë dhe nga ky aspekt mund të theksoj se rruga rajonale që tani e përdorim është në rehabilitim dhe do të përfundojë së shpejti. Kështu që e gjithë infrastruktura e kësaj pjese Shkup-Bllacë do të rindërtohet, normalisht me procedurat e përcaktuara nga Banka Europiane”, u shpreh më tej Boçvarski.

Lidhur me punën në korridoret 8 dhe 10D, Boçvarski hodhi poshtë pretendimet se nuk po bëhet asgjë. Tashmë po bëhen gërmime në terrene të veçanta, po bëhen edhe rrugë hyrëse për gërmim, si dhe projektimi i trasesë. Qeveria ka marrë dy vendime për përcaktimin e traseve, me çka është përcaktuar pozita e autostradës në ato pjesë, tha Boçvarski.

VIDEO:

/tv21