Pas dy viteve përfundoi hetimi për tragjedinë e autobusit “Besa Trans”, u fajësua shoferi që vdiq..!

Sot bëhen dy vjet nga aksidenti fatal i autobusit Besa Trans në autostradën e Strumës, në të cilin humbën jetën 45 shtetas të Maqedonisë së Veriut, kurse u lënduan shtatë të tjerë. Hetimet kanë përfunduar, ndërsa sipas autoriteteve bullgare dhe zëvendëskryeprokurorit bullgar, Borislav Sarafov, fajtori për aksidentin ka qenë shoferi, i cili gjithashtu ka humbur jetën.

Ndërkohë në Maqedoninë e Veriut, në Gjykatën Penale të Shkupit vazhdon gjykimi për këtë rast, në të cilin kompania si person juridik dhe pronari i kompanisë Bekim Haxhiu akuzohen për falsifikimin e certifikatës së licencës së autobusit i cili në orët e para të 23 nëntorit të vitit 2021, duke ardhur nga Stambolli për në Shkup, në autostradën “Struma” të Bullgarisë është aksidentuar dhe më pas është djegur. Si pasojë kanë humbur jetën 45 persona, ndërkaq 7 të tjerë janë lënduar, Portalb.mk.

Prokuroria e Maqedonisë së Veriut theksoi se aksidenti ka ndodhur në territorin e një shteti tjetër dhe se hetimet janë duke u zhvilluar nga kolegët e tyre në Bullgari. Ata thanë se mund vetëm të parashtrojnë kërkesa për ndihmë juridike ndërkombëtare.

Pesë nga familjet e të vdekurve tashmë kanë kundërshtuar hetimin e institucioneve atje, përmes një ekipi avokatësh.
Autobusi Besa Trans është përplasur në rrethojën e autostradës Struma, në afërsi të fshatit bullgar Bosnek, në orët e hershme të 23 nëntorit. Pak para kryqëzimit Bosnek, ai doli nga korsia, goditi rrethojat dhe më pas shpërtheu në flakë, duke vrarë 45 njerëz, 13 prej të cilëve ishin fëmijë.

Në Maqedoninë e Veriut tashmë ka nisur një proces gjyqësor ndaj pronarit të “Besa Trans” për falsifikimin e licencave. Brenda një viti, me një dokument publik fals, autobusi “Besa Trans” ka kaluar 20 herë kufirin shtetëror.

Për çfarë akuzohet “Besa Trans” dhe pronari i saj?
Autobusi i cili është aksidentuar nuk ka pasur certifikatë të licencës për transport ndërkombëtar, por gjatë kalimit të kufirit e ka përdorur certifikatën e një autobusi tjetër, ndërkaq Dogana e cila është dashur ta kontrollojë – e ka lëshuar. Prokuroria akuzon pronarin dhe “Besa Transin” se certifikata është falsifikuar, ndërkaq teza e mbrojtjes është se nuk ka falsifikim të dokumenteve në çështje – vepër për të cilën akuzohet drejtuesi dhe kompania. Ata pretendojnë se nuk është bërë dokument i rremë dhe as nuk është ndryshuar licenca ekzistuese për t’u përdorur si e vërtetë.

Sipas aktakuzës, 41-vjeçari Bekim Haxhiu, si pronar i “Besa Trans” nga fshati Rashçe, përmes shoferëve që drejtonin autobusin, ka përdorur certifikatë licence që nuk është lëshuar nga Ministria e Transportit dhe Lidhjeve. Me certifikatën e falsifikuar të licencës për qarkullim ndërkombëtar, autobusi është larguar 20 herë nga vendi vitin 2021 nga data 10 janar deri në aksidentin e nëntorit.

Drejtoria Doganore një ditë pas aksidentit informoi se pas kontrolleve të kryera, është vërtetuar se autobusi i “Besa trans” – Shkup i cili është djegur në autostradën në Bullgari, nuk ka qenë fare i evidentuar se ka dalë jashtë shtetit. Për këtë dy doganierë janë suspenduar nga puna për shkak veprimit të paligjshëm. Sipas njoftimit të Portalb.mk njëri doganier është përjashtuar nga puna, ndërkaq tjetri është gjobitur me 15 përqind të rrogës për gjashtë muaj.

Gjykimin e udhëheq gjyqtari Ivica Stefanovski, përfaqësues i Prokurorisë është prokurori publik Vlladimir Miloshevski.

Aksidenti në fjalë, ndodhi më 23 nëntor të vitit të kaluar në orët e para të mëngjesit, kur autobusi “Besa Trans”, i cili po kthehej nga Stambolli me turistë, u përplas në rrethojën e autostradës Struma, në afërsi të fshatit bullgar Bosnek. Në mesin e 45 të vdekurve ishin 12 fëmijë, ndërsa 7 mbijetuan.

Gjithçka në lidhje me rastin, lexojeni dosjen e përgatitur nga Portalb.mk: Aksidenti i autobusit në Bullgari, gjithçka që ndodhi në tragjedinë ku humbën jetën 45 persona

/tvkoha