Në Çikago u promovua monografia “Sali Ramadani-deputeti i krenarisë kombëtare”(FOTO)

Dispora e Kërçovës

Këshilli për botimin e monografisë kushtuar atdhetarit dhe veprimtarit të pathyeshëm Sali Ramadani-Kërçova, në ambientet e “Albanian-American Islamic center” organizoi promovimin e librit monografik “SALI RAMADANI-DEPUTETI I KRENARISË KOMBËTARE”. Për librin dhe veprimtarinë e simbolit të rezistencës, atdhedashurisë, dijes dhe guximit Sali Ramadani-Kërçova folën: Akademik Feti Mehdiu, profesori Ilaz Kadriu, Dr. Afrim Shabani, familjari i Saliut Refik Ramadani, moderatori i ketij organizimi Taip Beshiri dhe autori i librit Shaban Dalipi.

Sali Ramadani-Kërçova, ishte nje arsimtar dinjitoz dhe frymëzues i gjeneratave të reja për arsim e kulturë, protagonist i zgjimit kombëtar në periudha shumë të vështira të regjimit komunist, gazetar e publicist, krijues universal dhe autor i shkrimeve te botuara ne shtypin e kohës ku pasqyronte gjendjen e mjerueshme dhe diskriminuese te shqiptarëve në trojet e tyre etnike. Qysh ne moshën 20 vjeçare, prezentoi referatin ne gjuhën shqipe me kërkesa për të drejtat e merituara të shqiptarëve, në tubimin e Babunecit, me ç’rast i tmerroi strukturat e regjimit komunist, por i bëri krenarë shqiptarët e përbuzur skajshmërisht nga pushteti monist.

Sali Ramadani-Kerçova, mori mbeshtetjen e popullatës shqiptare në zgjedhjet parlamentare të vitit 1967 dhe 1969, por vullneti i elektoratit shqiptar u nëpërkëmb dhe fituesi i mandatit të deputetit u arrestua sipas skenarit të përgatitur nga UDB-ja, me aktakuzën e veprimtarisë armiqsore kundër shtetit, themelimin dhe udheheqjen me grupet armiqsore, pjesëmarrje në demonstrata dhe veprimtari irredentiste për shkëputjen e territoreve të Jugosllavise dhe bashkangjitjen e tyre me Shqipërinë.

Gjatë hetimit përjetoi tortura të tmerrshme, por ai mbeti i palëkundur në përcaktimet e tij, duke i demaskuar prokurorët dhe gjykatësit e Gjykatës së Qarkut ne Shkup. Në seancat e hapura të gjykimit maratonik, morën pjesë qytetarë të shumtë nga Kërçova, Ohri, Struga, Shkupi dhe Tetova. Në seancat gjyqësore qëndroi stoikisht dhe në mënyrë të dinjitetshme mbrojtjen për pafajësinë e tij e prezentoi në gjuhën shqipe.
Pas vuajtjes së dënimit, Saliu përqëndrohet në veprimtari të thuktë konspirative ne kuadër të organizatave BUSHA dhe Besëlidhja për Çlirim dhe Bashkim Kombëtar.

U këthye në vendlindje dhe në vitin 1994, pas nje fushate bombastike fitoi mandatin e deputetit. E vazhdoi misionin e tij kombëtar në mënyrë institucionale dhe bëri bujë me dy aktet e guximshme, duke folur shqip ne parlament dhe duke shpalosur flamurin kombëtar mbi foltoren e parlamentit. Ishte deputeti me cilësor dhe më sasior i parlamentit që e dëshmojnë edhe stenogramet zyrtare.

Sali Ramadani ishte themelues dhe drejtues i shoqatave kulturore prapa së cilave fshihej aktiviteti kombëtar dhe patriotik, themelues dhe drejtues i SHKA-ve “Xha Rexha” dhe “Xixa”, vazhdimisht i përndjekur politikisht, disa herë i arrestuar dhe i burgosur, por i pathyeshëm në bindjet e tij, edhe perkundër presioneve dhe torturave të shumta gjatë gjithë rrugëtimit të tij në misionin e kauzës kombëtare. Saliu la pas, bashkëshorten Sylbien dhe fëmijët: Besëlidhjen, Çlirimin dhe Kombëtarin, të cilët përbëjne emrin e organizatës ilegale “Besëlidhja për Çlirim dhe Bashkim Kombëtar”, u tha ndër të tjera në tubimin promovues të monografisë “Sali Ramadani-deputeti i krenarisë kombëtare”.
Për pjesëmarrësit në këtë promovim dhe ato që kontribuan për botimin e monografisë kushtuar deputetit të shqipes dhe flamurit kombëtar Sali Ramadani-Kërçova, u ndanë libra dhe mirënjohje.

FOTO: