Në vend të drejtësisë, raste të vjetërsuara! Gruevski dhe Mijallkov dalëngadalë po shpëtojnë nga dënimet..

“Ajo prokurori që do të ndjekë penalisht korrupsionin e lartë nga sot, nga dje, nga nesër, do të jetë edhe për ne nëse ndonjëri prej nesh i prek paratë e shtetit. Pa një shtet ligjor, ne nuk do ta shohim Europën as në hartë”, tha Stevo Pendarovski, president i RMV-së (2019).

Kështu tha presidenti i shtetit Stevo Pendarovski në fushatën e tij zgjedhore para 4 viteve e gjysmë. Ai këto ditë në intervistë për TV21 foli për ndryshimet në Kodin Penal, të cilat edhe pse i ka konsideruar të këqija, megjithatë e firmosi dekretin. Ai tentoi të ndryshojë temën duke thënë se në sistemin juridik ka anashkalim të drejtësisë.

“Le të kthehemi te rasti që e përmenda me Qytetin e diellit. Në aktakuzë thuhet se Mile Janakieski e ka bërë këtë, krim që dyshohet se është kryer në vitin 2007. Pra 16 vite më vonë a e dini se ku jemi me këtë rast? Vetëm deri në vendimin e shkallës së parë. Pra nuk ka arritur në shkallën e dytë. Do të doja që ta kthejmë vëmendjen tek gjyqtarët që i mbajnë lëndët në sirtar qoftë sipas vullnetit të tyre apo nën ndikimin e pushtetit politik dhe ekonomik dhe të shohim se pse e bëjnë këtë”, deklaroi Stevo Pendarovski, president.

Ndryshimet në Kodin Penal i rrëzuan të gjitha krimet e përmasave më të mëdha, kryesisht të hapura nga Prokuroria Speciale Publike, dhe dy kushërinjtë Gruevski dhe Mijallkov dalëngadalë po shpëtojnë nga përgjegjësia. Ministri Oliver Spasovski u pyet tri herë në emisionin “Trilling” se a i vjen turp nga vendimi për ndryshime të tilla, ai thotë se ndryshimet në ligj janë moment i keq.

“Duhej të kishte përgjegjësi për këdo që ka marrë pjesë në përgjime të tilla të paligjshme apo çfarëdo lloj krimi dhe mendoj se kjo është diçka që qytetarët e kanë pritur dhe ne jemi përgjegjës para qytetarëve pikërisht për këtë. Sigurisht që ndryshimet në Kodin Penal kontribuuan në këtë dhe mendoj se është një moment shumë i keq”, tha Oliver Spasovski, ministër i Brendshëm.

Kryeministri Kovaçevski iu shmang përgjigjes për vjetërsimin e lëndës së Mijallkovit me përgjimet e mëdha.
“Nuk kam komentuar asnjëherë procese gjyqësore. Ajo që është karakteristike është se bëhet fjalë për rast, nga ajo që e kemi në dispozicion publikisht, rast që ka filluar në vitin 2015 dhe tashmë tre vjet është në procedurë të shkallës së dytë, por gjatë atyre 8 viteve nuk ka përfunduar si lëndë. Kështu që nuk kam mundur të jap të gjitha përgjigjet për efikasitetin në zgjidhjen dhe rrjedhjen e rastit, mund ta japin vetëm ata që kanë punuar në këtë rast”, pohoi Dimitar Kovaçevski, kryeministër.

Me ndryshimet në Kodin Penal, Target-Fortesa, Tenderët, Titaniku, TNT, Talir, Trajektorja vjetërsohen. Gruevski lirohet nga rastet TNT dhe Trajektorja, dhe pas një viti nga Tanku. Ndërpriten edhe rastet me autobusët kinezë për Janushevin, Toplik dhe TNT për Janakieskin. Në rastin I Forti, Miloshoski u shpëtua nga njëra nga dy akuzat që ishin ngritur kundër tij.

Por reagimin më të madh e shkaktoi vjetërsimi i Target-Fortesa, ku ish-drejtori i DSK-së Sasho Mijallkov u akuzua për përgjimin e 20 mijë qytetarëve. “Sa para do t’i kthejmë Mijallkovit le të matë matësi” është një nga reagimet në Tuitter sepse përveçse që nuk do të ketë përgjegjësi, me shumë gjasa do të kërkojnë edhe dëmshpërblim.

/tv21