Tito në Guinness sepse shikonte shum filma..!

Ish-presidenti komunist jugosllav, Josip Broz Tito, ishte një adhurues i zjarrtë i filmave ku ai i shikonte shumicën e tyre në sallën e tij të kinemasë dhe kinemanë verore në rezidencën e tij në Brijuni, Kroaci.
Në pjesën më të madhe bëhej fjalë për filma të prodhimit amerikan apo perëndimor.

Gjithashtu, në vitin 1955 u ndërtua në Brijuni një kinema verore e projektuar nga arkitekti Vinko Glanz, ku ai dhe përfaqësues të lartë patën mundësinë të shijonin shfaqje të ndryshme filmash.

Gjatë sundimit të tij nga viti 1945 deri në vdekjen e tij në vitin 1980, Tito kishte akses në prodhime të ndryshme filmike dhe ishte mysafir i shpeshtë i festivaleve të filmit jugosllav dhe të huaj.

Për Brijunin ka informacione se ai ka shikuar 8801 filma nga viti 1949 deri në vitin 1980, që do të thotë se Tito shikonte deri në 284 filma në vit.
Sipas informacioneve nga Brijuni, të cilat mund të gjenden në një pllakë pranë kinemasë verore, në vitin 1957 ai ka parë deri në 365 filma, falë të cilëve hyri në Librin e Rekordeve Guinness.

Pos kësaj, Tito fitoi një reputacion si mikpritës që shpesh priste personazhe të famshëm nga bota e artit, politikës dhe argëtimit në Brijuni.
Ndër njerëzit e rëndësishëm që ndanë momentet e shikimit të filmave me Titon në Brijuni ishin Elizabeth Taylor, Sophia Loren, Orson Welles, Richard Burton, e shumë të tjerë.

Tito ishte homolog i Enver Hoxhës në Jugosllavi, por ndryshe nga diktatori komunist shqiptar, në ekonomi i dha shtetit të tij një frymë neoperëndimore.

/tesheshi.com/