Shoqëria e shqiptarëve të Maqedonisë – e mbuluar nga plehu i injorancës..!

Më villet kur i dëgjoj dhe i lexojë disa paragjykues dhe anti-islamistë të sëmurë (kryesisht kalemxhinj nga Prishtina që mbulohen me tituj shkencorë) që thonë se problemi më i madh i shqiptarëve të Maqedonisë është fanatizmi i tyre fetarë?!

Jo, bashkëkombësit e mi të Maqedonisë kanë një problem tjetër: ata jetojnë në një shoqëri ku sistemi arsimor është rrënuar deri në ato përmasa sa atë e kontrollojnë politikanët e dështuar dhe si i tillë, ai sistem prodhon injorantë të diplomuar.

Pastaj shenjë njohëse e shoqërisë shqiptare në Maqedoni janë ‘doktorët’ e shkencave dhe hoxhallarët që nuk e kanë lexuar deri në fund as abetaren.
Andaj edhe në një shoqëri të tillë ndodhë që ‘bëmirës’ më zemërgjerë ndaj hallexhinjtë dhe ‘donatorë’ më të mëdhenj për ndërtimin e objekteve fetare të jenë edhe disa hajdut politik dhe narkodilerë.

Dhe duke jetuar në një shoqëria të mbuluar nga plehu i injorancës, shumë shqiptarë të mi nga Maqedonisë, vetveten e mbulojnë me fenë, duke mos lënë namaz pa falë, por ndërkohë duke mos vërejtur se atyre u ka ikur frika nga Zoti dhe i tremben vetëm kryetarit të komunës, të pushtetshmit dhe policit me shkopin e gomës në bel.
Se sa është i vërtet ky pohim imi e ‘dëshmon’ edhe fotografia e cila e shoqëron këtë postim, e shkrepur me 25 gusht, rreth orës 20.

Zjarri dhe tymi që ka mbuluar brigjet e lumit Treska, si dhe fshatrat përreth, e shpalosë fytyrën e atyre që i luten Zotit, por i përkulen policit, fytyrën e atyre që mbeturinat e shtëpisë së vet i hedhin në oborrin e shtëpisë së Zotit, shtëpisë që na takon të gjithëve!

Por sidoqoftë, vazhdon të më villet sa herë që dëgjoj të thuhet (edhe atë nga alamet profesorë, kryesisht nga Prishtina) se shqiptarët e Maqedonisë na qenkan ‘fanatikë’ fetarë. Përkundrazi: shumica e tyre nuk besojnë gjithaq as në fe e as kanë frikë Zotin dhe si të tillë, janë të ngjashëm me antifetarët: injorancën e vet e mbulojnë me arrogancën ndaj të tjerëve!
Nga: Kim Mehmeti

/ts