Flet pronari i ‘Dalina Tours’: Shoferi i autobusit s’e shkaktoi aksidentin me fatalitet, biçiklisti fajtor..
Një aksident i rëndë trafiku ka ndodhur para rreth një ore në rrugën e Kombit, ku një autobus me targa të Kosovës ka përplasur një biçiklist 72-vjeçar dhe për pasojë i njëjti ka humbur jetën. Vdekjen e të moshuarit e ka konstatuar ekipi mjekësor, ndërsa rasti tashmë është konfirmuar edhe nga kompania, raporton Gazeta Sinjali.
Sinjali ka kontaktuar pronarin e kompanisë, “Dalina Tours” nga Kamenica, për të marrë informacionet e para që kanë lidhur me aksidentin me fatalitet dhe i njëjti ka thënë se biçiklisti ka qenë fajtor. Ndonëse hetimet veçse kanë filluar, pronari tha se viktima ia ka prerë rrugën autobusit, prandaj shoferi nuk është shkaktar i aksidentit.
“S’jom atje, edhe nuk e diqysh ka ndodhë e as çka ka ndodhë. E di që një këmbësor me bicikëll e ka pre rrugën. Autobusi ka qenë duke shku në Shqipëri. Aksidentin e ka shkaktu ai që e ka pre rrugën, këmbësori gjithqysh është fajtor.”, tha ai. Shoferi i autobusit, 60-vjeçari kosovar E. R., është shoqëruar në Polici, ndërsa sipas pronarit i njëjti është liruar.
/gazetasinjali
