Ahmeti: Dënoj ashpër rrëmbimin e policëve në Kosovë, të organizohet urgjentisht një tavolinë bisedimesh..!
Kryetari i Bashkimit Demokratik për Integrim, Ali Ahmeti, nëpërmjet rrjeteve sociale ka dënuar ashpër rrëmbimin e tre policëve të Kosovës nga policia serbe. Ahmeti apelon për ulje të tensioneve dhe thirrjen urgjente të një tavolinë bisedimesh mes palëve, me ndërmjetësimin e ndërkombëtareve.
Ai, po ashtu, shton se integriteti dhe sovraniteti territorial i Kosovës është i paprekshëm dhe i garantuar nga faktori ndërkombëtar.
“Dënoj ashpër aktin e kidnapimit të policëve të Kosovës sot nga forcat speciale të Serbisë dhe pres lirimin e menjëhershëm të tyre.
Pala serbe duhet ti ndalojë provokimet menjëherë dhe të dyja palët të ulen urgjentisht në tavolinën e bisedimeve dhe me ndërmjetësimin e aleatëve tanë, bashkësisë euro-amerikane, t’i japin fund kontestit shumëvjeçar përmes njohjes së ndërsjelltë.
Integriteti dhe sovraniteti territorial i Kosovës është i paprekshëm dhe i garantuar nga faktori ndërkombëtar.
Tani është koha të ndërmerren veprime që të ruhet paqja, stabiliteti rajonal dhe perspektiva jonë europiane.”- shkruan Ahmeti.
/tv21
