Kasami: BDI dhe argati i saj në Qeveri janë servil të Serbisë e Rusisë..(VIDEO)
“Teatër politik”, i ka quajtur zhvillimet e fundit lidhur me ndryshimet kushtetuese, kryetari i Lëvizjes BESA, Bilall Kasami. Ai ka thënë se LSDM-ja dhe dy partitë shqiptare në Qeverinë aktuale, BDI dhe ASH i shërbejnë interesave serbe dhe ruse në vend, prandaj siç u shpreh ai, me këto subjekte në pushtet, populli as nuk mund ta ëndërrojë Evropën. Si zgjidhje për daljen nga kjo situatë, Kasami i sheh zgjedhjet e parakohshme parlamentare, shrkuan gazeta LAJM.
“Lëvizja Besa me vëmendje dhe shqetësim po i ndjek zhvillimet e fundit politike në vendin tonë dhe njëkohësisht edhe teatrin që po i servohet popullit nga vazalët e LSDM-së, BDI-ja e Ali Ahmetit dhe argati tjetër në Qeveri, i cili mori votat për të rrëzuar e jo për të shpëtuar këtë Qeveri dhe BDI-në.
Pas shfaqes teatrale të BDI-së në të cilët aktori Bujar Osmani vetëm sa nuk filloi të qajë sa e dashka BDI-ja Evropën, ditë më parë me të njejtin skenar doli edhe sateliti i BDI-së, por për dallim nga BDI-ja e cila është e padëshiruar jo vetëm në Qeveri por edhe në popull, argati tjetër në qeveri, dyshonte se VMRO-ja nuk e dashka as partinë e tij në Qeveri. Gjithë kjo u shit sikur qenka sakrificë për rrugën drejt Evropës.
Partitë vazale në Qeveri harrojnë se janë kultivuesit më të mëdhenj të aseteve kundër Evropës, të krizës ekonomikë, korrupsionit, gjyqësorit të kapur, ku kanë vendosur fëmijët e tyre dhe anëtarët tjerë të familjes me të vetmin qëllim që të përvetësojnë dhe asgjësojnë sistemin e drejtësisë. I’a bëjmë me dije Ali Ahmetit dhe argatit të tij në Qeveri, se populli nuk e han më këtë gjellë të prishur dhe të servuar me petkut pro-evropian. Ky teatër dhe këto mashtrime populli ka kohë që i ka kuptuar.
Si Lëvizje Besa dhe si popull i këtij vendi ua themi hapur se ju që jeni pjesë e hetimeve ndërkombëtare për krim, korrupsion, shantazhë dhe larje parash përmes tenderëve që zgjasin prej një dekade e më shumë, nuk mund të na çoni në Evropë. Nuk nuk mund të na çojë në Evropë kjo qeveri në të cilën dy partitë shqiptare BDI dhe ASH, ditën vajtojnë më Evropën e natën e bëjnë të kundërtën. Të dy këto subjekte nuk ia dolën të ndryshojnë asgjë.
Jo gjendjen e shqiptarëve në RMV por as edhe një 20% fyes për këtë popullatë. Lëvizja Besa, kërkon nga kjo qeveri të shpallë sa më parë zgjedhje të parakohshme dhe këta vasal të Rusisë e Serbisë të hiqen nga kolltuqet sepse me këtë RMV-ja vetëm mund të humb edhe ato pak shanse për në Evropë. Me këtë qeveri populli as që mund të ëndërrojë aderimin në familjen evropiane”, tha Kasami.
VIDEO:
/Gazeta LAJM
