Vetëm 11 për qind e serbëve të gatshëm të luftojnë në Kosovë..
Një anketë e realizuar prej 24 prillit deri më 4 maj të këtij viti nga qendra kërkimore në Beograd “Demostat”, tregon se 11 për qind e të anketuarve do të luftonin për Kosovën, ndërsa 65 për qind kundërshtojnë çdo konflikt me shqiptarët dhe bashkësinë ndërkombëtare.
Sociologu serb, Sreçko Mihailoviç, gjatë prezantimit të gjetjeve të opinionit publik, ka thënë se rezultatet e anketës tregojnë se 22 për qind e të anketuarve besojnë se Rusia është bastioni i politikës së jashtme të Serbisë, ndërsa 20 për qind mendojnë se është Bashkimi Evropian.
Kur janë pyetur nëse janë pro Lindjes apo Perëndimit, rreth 30 për qind e të anketuarve janë shprehur pro Rusisë e Kinës, ndërsa 35 për qind janë deklaruar pro Bashkimit Evropian, Shteteve të Bashkuara dhe vendeve skandinave, transmeton gazeta opozitare serbe “Danas”.
Mihailoviç deklaroi se 23 për qind e të anketuarve janë pro vendosjes së sanksioneve ndaj Rusisë për agresionin e paprovokuar në Ukrainë, ndërsa 35 për qind janë deklaruar kundër, kurse 42 për qind janë përgjigjur me “nuk e di”.
Sa i përket politikës së brendshme të shtetit serb, Zoran Stoilkoviç, profesor i Fakultetit të Shkencave Politike në Beograd, vlerësoi se hulumtimi i “Demostat” tregon të dhënat më “dramatike e të çuditshme”, të cilat flasin për “fillimin e fundit” të regjimit atje!
/ina
