Ja pse Cyrihu ka pagat më të larta në Zvicër..?

Pagat e Zvicrës në përgjithësi janë jashtëzakonisht të larta, por nëse i analizoni më nga afër, do të shihni se, për sa u përket pagave, disa rajone shkojnë më mirë se të tjerët.

Logjikisht, të ardhurat janë më të larta në qytetet e mëdha sesa në qytetet e vogla dhe zonat rurale, pasi aty janë shumica e mundësive ekonomike, shkruan The Local, përcjell albinfo.ch.

Megjithatë, pabarazitë në të ardhura ekzistojnë edhe ndërmjet qendrave urbane. Kjo është treguar në sondazhe të ndryshme, duke përfshirë edhe atë të fundit, të publikuar këtë muaj nga HES-SO, shoqata ombrellë e universiteteve zvicerane të shkencave të aplikuara (UAS).

Ndryshe nga universitetet e përgjithshme, UAS nuk ofron diploma Master ose Doktoraturë por programe Bachelor të lidhura me një fushë specifike profesionale. Ato shpesh frekuentohen nga njerëz që kanë përfunduar formimin e tyre profesional dhe dëshirojnë të vazhdojnë arsimimin e tyre, përcjell tutje albinfo.ch.

Çfarë gjeti ky sondazh?
Ajo që doli nga ky studim është se të diplomuarit e universiteteve të shkencave të aplikuara fitojnë dukshëm më shumë në vitin 2023 sesa dy vjet më parë, kur u krye studimi i fundit.

Paga mesatare vjetore e tyre aktualisht arrin në 104,000 franga, krahasuar me 100,000 më 2021.
Megjithatë, rezultatet tregojnë gjithashtu se ka pabarazi rajonale, ku pagat janë më të larta në gjermanisht sesa në Zvicrën frëngjishtfolëse.

Ndër kantonet, Cyrihu është në krye, me të ardhura mesatare prej pak më shumë se 111,000 franga në vit.

Ky nuk është saktësisht një informacion i ri: statistikat tregojnë se pagat në Cyrih janë 10.8 për qind më të larta se në Gjenevë dhe 5.4 për qind më të larta se në Bazel.

Si mund të shpjegohet kjo mospërputhje?
The Local ia bëri këtë pyetje Fabian Büsser, drejtor në agjencinë e rekrutimit Michael Page.

Ai tha se është çështje se cilat punë janë më të kërkuara dhe vendndodhja e tyre gjeografike. “Disa nga punët më të paguara janë në financa, sigurime, IT dhe inxhinieri,” vuri në dukje ai, shumica e të cilave ndodhen në pjesën gjermanishtfolëse të Zvicrës.

“Ky rajon përbën gati 90 për qind të vendeve të punës të shpallura në këta sektorë dhe është shtëpia e bankave, siguruesve dhe kompanive më të mëdha të teknologjisë, si dhe firmave të tjera që kërkojnë inxhinierë, si pasuritë e paluajtshme dhe pronat,” tha Büsser.

Sipas indeksit më të fundit të punës zvicerane Michael Page, ndërsa 89 për qind e këtyre vendeve të punës mund të gjenden në rajonin gjermanishtfolës, vetëm 10 për qind janë në zonën frëngjishtfolëse (dhe akoma më pak – 1 për qind – në Ticino).

Megjithatë, ka disa lajme pozitive për pjesën zvicerane-franceze
Sondazhi i HES-SO zbuloi se ndërsa ky rajon mbetet pas pjesës gjermanishtfolëse, pagat atje janë rritur ndjeshëm.

Paga mesatare vjetore në zonën e Gjenevës është 92,300 franga, që korrespondon me një rritje prej 8.4 për qind krahasuar me dy vjet më parë.

Ky është veçanërisht rasti në degën e IT, me një pagë mesatare prej 112,000 frangash, e ndjekur nga financat dhe sigurimet, me 106,000 franga.

Si krahasohen këto paga me ata që diplomohen në universitete ‘të rregullta’?
Zvicra ka disa lloje institucionesh të arsimit të lartë: universitete kantonale dhe dy institute politeknike federale: një në Cyrih (ETH) dhe tjetri në Lozanë (EPFL).

Ato konsiderohen si institucionet arsimore ‘më të larta’.
Të diplomuarit e këtyre institucioneve mund të fitojnë deri në 10,170 franga në muaj, që arrin në 122,000 në vit.

/albinfo