Kompania e betonit në Kërçovë pa leje ekologjike! 5 vjet funksionon ilegalisht..! (VIDEO)
Kompania “Euro Transport Beton” e cila funksionon në lagjen Pashin e Epërme në Kërçovë, nuk posedon leje të integruar B të cilën e jep Ministria e Ambientit Jetësorë.
Ditë më parë banorët e lagjes nëpërmjet TV21 kërkuan që kompania në fjalë të dislokohet sepse po pengon banorët e lagjes me pluhurin dhe zhurmën që krijon gjatë përpunimit të betonit.
Nga inspektorati komunal i ambientit jetësorë Kërçovë, thonë se kjo bazë betoni nuk ka bërë asnjëherë kërkesë për leje të integruar edhe pse funksionon tashmë 5 vjet.
“Tek unë leje B nuk kanë dhënë. Nga ana ekologjike unë personalisht nuk kam dhënë”, tha Emilija Petrevska Petkovska- inspektore e Ambientit Jetësorë.
Përveç kësaj, burime brenda komunës së Kërçovës thonë se objekti është ilegal dhe pa leje ndërtimi. Në 2017 kur kjo kompani ka filluar të ndërtohet, me kërkesë të banorëve të lagjes, Inspektorati i ndërtimit ka dal në terren dhe ka konstatuar se e njëjta nuk mund të ndërtohet.
“Inspektori i Ndërtimit me kërkesën tuaj ka dal në terren dhe ka kryer kontrolle në datë 13.12.2017 në vendin KP.NR 4928/3 për ndërtimet A,B,V, G, kategori e dytë dhe është sjellë vendim që brenda 30 ditësh këto ndërtime të prishen”, thuhet në vendimin e Inspektoratit të Tregut në vitin 2017.
Ky vendim nuk është marrë fare parasysh nga kompania, pasi sot e kësaj ditë ajo ka vazhduar me punë. Ankesat e banorëve tani për tani kanë hasur në vesh të shurdhër.
VIDEO:
/tv21
