Intervistë me Arton Lena, Drejtor Ekzekutiv i WVP Fund Management

Fondet e investimit në aksione u prekën, në një masë më të vogël, nga rritja e normave të interesit, krahasuar me fondet që investojnë në instrumente borxhi.

Arton Lena, Drejtor Ekzekutiv i WVP Fund Management Tirana, thotë se, megjithatë, rritja e normave të interesit ndikoi në zinxhirin e ekonomisë, duke bërë që edhe aksionet e kompanive, ku investojnë fondet shqiptare, të pësonin rënie.

Pavarësisht kësaj, ai thotë se fondet nuk patën largime investitorësh, madje patën një rritje të numrit të tyre, nga individë që i panë fondet në aksione si një mundësi e diversifikimit të portofolit të tyre.

Sipas tij, perspektiva e fondeve të investimit në vitin 2023 dhe në të ardhmen do të varet nga niveli i edukatës financiare dhe informimi i qartë i investitorëve.

Nëse investitorët ndëgjegjësohen mbi përparësitë e investimit afatgjatë dhe shpërndarjes së investimeve të tyre në fonde, me politika të ndryshme investimi, sipas tij, e ardhmja e fondeve do të jetë pozitive.

Z. Lena mendon se një element që mund të nxisë rritjen e industrisë së fondeve janë edhe investitorët institucionalë, që duhet të fillojnë t’i diversifikojnë një pjesë të aseteve nga depozitat dhe obligacionet në fondet e investimit.

Rritja e interesave krijoi një mjedis sfidues për tregun e fondeve të investimit në vitin 2022. Çfarë efektesh dhe pasojash dha rritja normave të interesit për fondet tuaja të investimeve?

Fondet e administruara nga WVP Fund Management Tirana kanë politikën investuese në aksione të kompanive më të mëdha në botë dhe nuk investojmë në obligacione, të cilat ndikohen shumë nga lëvizjet e normave të interesit.

Megjithatë, rritja e normave të interesit indirekt ndikon në zinxhirin e ekonomisë, duke filluar nga konsumatori, bizneset e kështu me radhë.

Si pasojë e rritjes së normave të interesit, aksionet e kompanive ku ne investojmë patën rënie, por kjo nuk ishte aq e madhe si në rastin me fondet që investojnë në obligacione.

Pasojat nga tërheqja e investitorëve nga investimet ishin gati zero, pra ne patëm efektin e kundërt: investitorët largoheshin nga fondet investuese në obligacione dhe investonin në fondet tona që të kenë ekspozim në aksione, të mos jenë të ekspozuar vetëm në instrumente borxhi, siç janë obligacionet, dhe të shpërndajnë rrezikun e përqendruar në ekonominë vendase, duke përfituar nga zhvillimi i ekonomisë globale.

Si e menaxhuat situatën e krijuar nga rritja e normave të interesit dhe rënia e kthimeve të fondeve? A ndërmorët ndryshime në politikat tuaja të investimit?

Mënyra më e mirë për të menaxhuar situatën, sidomos në raste të tilla, është komunikimi i sinqertë dhe intensiv me investitorët, agjentët dhe të gjithë stafin e kompanisë.

Duke ua bërë të qartë që ne investojmë në kompani të shëndosha, shumëvjeçare, që kanë kaluar disa kriza botërore dhe janë me bilance të fuqishme (siç janë: Microsoft, Apple, Roche AG, Allianz, etj.) investitorët e fituan besimin që të qëndrojnë të investuar në këtë periudhë dhe si rezultat patëm shumë pak tërheqje nga fondet dhe shtuam investimet.

Për t’u cekur është fakti që ndikim në ecurinë e fondeve tona kishte edhe lufta me Rusi – Ukrainë, por si përfundim e mbyllëm vitin me kthim negativ minimal prej rreth -7%, pas një viti me kthim pozitiv prej rreth 22% për fondin në euro – WVP Global.

Siç e përmenda edhe më lart, fondet tona janë gati të vetmet në Shqipëri që kanë politikë investuese vetëm në aksione të kompanive më të mëdha në botë.

Kjo, edhe pse në fillim duket si një politikë investuese me volatilitet (luhatje të çmimeve) më të lartë, në situata të tilla, siç ishte viti 2022 dhe duke vijuar në vitin 2023, si dhe për investime afatgjatë (mbi 10 vjet) tregohet si një politikë e qëlluar investimi.

Si i parashikoni perspektivat e fondeve të investimit për vitin 2023 dhe në ç’mënyrë do të ndikojë rritja e mëtejshme, e pritshme, e normave të interesit?

Fakti që në Shqipëri, fondet me më shumë asete nën administrim janë të investuara në obligacione të shtetit shqiptar, kuptohet që rritja e normave të interesave do të ketë ndikim negativ në çmimin e obligacioneve, të cilat janë në portofol të fondeve investuese.

Nga ana tjetër, për investitorët që kanë durimin dhe disiplinën për të investuar në një horizont më të gjatë kohor, tani është moment i mirë për të investuar.

Me fluksin e investimeve të reja, fondet investuese mund të investojnë në obligacione me interesa më të larta, që do sjellin fitime të mira për investitorët.

Perspektiva e fondeve të investimit për 2023 dhe në të ardhmen gjithmonë do të varet nga niveli i edukatës financiare dhe informimi i qartë i investitorëve.

Nëse arrimë të vetëditësojmë, informojmë dhe edukojmë investitorët mbi përparësitë e investimit afatgjatë, shpërndarjes së investimeve të tyre në fonde me politika të ndryshme investimi si ato në aksione dhe në obligacione, besoj se kemi një të ardhme të mirë.

Diçka që mund të nxisë rritjen e industrisë së fondeve investuese janë edhe investitorët institucionalë, të cilët duhet të fillojnë të mendojnë një pjesë të aseteve të tyre t’i diversifikojnë nga depozitat dhe obligacionet në fondet investuese me politikë tjetër investuese.

Cilat mund të jenë risitë e pritshme në tregun e fondeve të investimeve në periudhën në vazhdim?
Mendoj se edhe shoqëritë e tjera administruese do të fillojnë të shikojnë alternativa për t’u ofruar investitorëve fonde që investojnë në aksione, ose të balancuara, pasi vitin e kaluar dhe këtë vit u pa që të jesh i investuar vetëm në një tip instrumentesh financiare nga një emetues paraqet rrezik, sidomos në raste paniku dhe ngërç të likuiditetit.

Fondet Alternative janë risi tjetër që ka hapësirë për t’u zhvilluar në Shqipëri, sidomos në sektorin e pasurive të patundshme, Startups, por edhe energjisë alternative. Për këtë do të duhet të punohet shumë në rritjen e besimit dhe profesionalizmit të investitorit vendas.

/monitor.al