Mbahet Kuvendi PanShqiptar.I ftuar Nderi edhe ILAZ KADRIU nga Kërçova..

Intelektuali e veprimtari politik Ilaz Kadriu me origjinë nga fshati Sërbicë i Kërçovës,por që jeton e vepron në Amerikë që nga koha e ish shpërbërjes të federatës Jugosllave,në këtë kuvend Pan Shqiptar,do të marr pjesë në cilësin e të ftuarit të nderit si Ish Kryetar në dy mandate i Komunitetit Shqiptaro-Amerikan në shtetin e Illinois-it me seli në Chicago.

Në cilësinë e kryetarit të Komunitetit Shqiptaro-Amerikan,Ilaz Kadriu ka takuar shumë personalitete të administratës amerikane në Shtëpinë e Bardhë, në Kongres, në Senat dhe State Departmentin Amerikan, si, p.sh: Joseph Biden, Wesley Clark, Bob Dole, Henry Hyde, Mark Kirk, çiftin Clinton, Madelaine Albright, Tom Lantos, Dick Durbin, e shumë të tjerë.

Të gjitha takimet kanë pasur për qëllim avancimin e çështjes shqiptare në Ballkan, me theks të veçantë pavarësimin e Kosovës.
Në veprimtarin e tij të pasur vlen të veçohet se Ilaz Kadriu gjithashtu ka qënë një ndër bashkëpunëtorët më të ngushtë në Amerikë i Presidentit historik të Kosovës dr. Ibrahim Rugoves.

ILAZ KADRI u lind në fshatin Sërbicë të Kërçovës, sot Republika e Maqedonisë së Veriut, ku mbaroi shkollën tetëvjeçare. Në vitin shkollor 67/68 diplomoi me sukses të shkëlqyeshëm në Normalen e Shkupit.

Tre muaj pas diplomimit, me vetiniciativë udhëton për Paris, ku qëndron legalisht, punon dhe studjon gjuhën frenge në Alliance Internationale “Georges Duhamel”, ku mbaron kursin e katërt gjer në tetor të vitit 1972, kur kthehet në Prishtinë dhe regjistrohet në Fakultetin Filozofik në Prishtinë, në Katedra e gjuhës dhe letërsisë frënge.

Si student i vitit të tretë, filloi të punojnë në gjimnazin e atëhershëm të Prishtinës “Ivo Llolla Ribar”, tani “Sami Frashëri” dhe “Xhevdet Doda”.
Pas diplomimit, kaloi në Akademinë Pedagogjike-Prishtinë, ku qëndroi gjer në gjysëmvjetorin e vitit 79/80. Si njohës i mirë i gjuhës frënge, caktohet përkthyes zyrtar i gjuhës frenge-shqipe-serbokroate, pranë Gjykatës së Qarkut në Prishtinë dhe në të njejtën kohë kalon në repartin e Fabrikës së Amortizatorëve të Francës -në Prishtinë, sektori “Les Amortisseurs Prishtina” si inokorrespondent, gjer më 29 gusht 1990, kur edhe u largua me dhunë nga regjimi i Millosheviqit.

Në vitin 1984/85, Fabrika e Amortizatorëve e dërgoi në specializim të gjuhës angleze në Universitetin e Chicago-s, ku merr diplomen e mbarimit të kursit të 5-të akademik.
Gjatë qëndrimit 20-vjeçar në Prishtinë, si student në vitin 1972, në revistën “Jehona” të Shkupit, botoi një përkthim të gjatë lingustik nga përmbledhja “Encyclopedie de la Playade” të Eric Buisson.

Më vonë, bashkëpunoi me gazetën e studentëve “Bota e Re”, ku botoi artikuj dhe përkthime të ndryshme gjithmonë duke trajtuar probleme gjuhësore dhe çështje të rëndësishme të përkthimit. Pakëz më vonë shkruan edhe në gazeten e përditshme “Rilindja” dhe bëhet bashkëpunëtor i jashtëm i Institutit Albanologjik në Prishtinë ku edhe përkthen rezymetë e punimeve shkencore në serinë filologjike të revistës “Gjurmime Albanologjike”, në të cilën revistë ka shkruar edhe disa recensione për vepren e akademikut rumun Haralambie Mihaescu: “Gjuha latine në jug-lindje të Europës”, për veprën e filozofit francez Charles Lalo “Les Notions de L’Esthetique”, përkthim i dr. Ibrahim Rugovës, recension për fjalorin Shqip-Frengjisht të autorit Dr. Murat Bejta, pastaj të punimeve shkencore-sintakse, të autorit dr. Ruzhdi Ushaku etj.

Artikuj të ndryshëm ka shkruar edhe në revisten rumune “Revue des Etudes Sud-Est Europeennes” në Bukuresht në gjuhën frënge, kurse të njejtin artikull e ka botuar edhe në gjuhën kroate në Zagreb, në revistën: “Suvremena Linguistika”.

Një vit më vonë, shkoi në Chicago. Fillimisht punoi gjithçka, duke llogaritur punën e taksistit, kurse më vonë punoi si profesor i gjuhës frënge në Elmhurst College, në pjesën perëndimore të Chicago-s.

Në shkurt të vitit 1991 inkuadrohet në kryesinë e Lidhjes Demokratike të Kosovës, Dega në Chicago, ku më vonë bëhet sekretar dhe kryetar i saj për dy mandate me rradhë.
Menjëherë pas Luftës së Kosovës, në Chicago me iniciativen e tij u themelua Komuniteti Shqiptaro-Amerikan në shtetin e Illinois-it me seli në Chicago dhe ishte kryetar i tij në dy mandate.
Për punën e tij të suksesshme dhe aktivitetet e tij politike u dekorua me Medaljen e Presidentit nga dr Rugova.

Në momentin e përpilimit të kësaj biografie është në proces të përfundimit të librit “Një histori e heshtur në Chicago”.
Gjatë qëndrimit 30-vjeçar në Amerikë, ka bashkëpunuar me të gjitha gazetat në Kosovë, sidomos me Qëndren Informative të Kosovës, të njohur si QIK, “Bota Sot”, në Maqedoni me “Koha”, “Lajm” dhe me INA, agjensinë e lajmeve në Shkup, kurse në Shqipëri me gazetat: “Kritika”, “Shekulli” etj.

Artikujt e botuar nëpër gazetat pas 1991 me se shumti kanë pasur karakter informativo-gazetaresk lidhur me aktivitetet e Komunitetit Shqiptaro-Amerikan në drejtim të Pavarësimit të Kosovës.
Në Amerikë ka botuar shumë artikuj në gazetën shqiptaro-amerikane “Illyria” në New York dhe në gazetën e hershme “Dielli” në Boston, themeluar nga Noli dhe Konica, kurse sot gazeten e drejton Sokol Paja.

Gjer sa jemi këtu, është e nevojshme të cekim se Ilaz Kadriu ka qënë një ndër bashkëpunëtorët më të ngushtë në Amerikë të Presidentit historik të Kosovës dr. Ibrahim Rugoves.
Vlen të shtohet poashtu se në cilësinë e kryetarit të Komunitetit Shqiptaro-Amerikan, personalisht ka kontaktuar shumë personalitete të administratës amerikane në Shtëpinë e Bardhë, në Kongres, në Senat dhe State Departmentin Amerikan, si, p.sh: Joseph Biden, Wesley Clark, Bob Dole, Henry Hyde, Mark Kirk, çiftin Clinton, Madelaine Albright, Tom Lantos, Dick Durbin, e shumë të tjerë. Të gjitha takimet kanë pasur për qëllim avancimin e çështjes shqiptare në Ballkan, me theks të veçantë pavarësimin e Kosovës.

/gazetaealpeve