Fatmir Dehari 10 vjet kryetar i Kërçovës! Ja çfar thon qytetarët për punën e tij..(VIDEO)

Kërçova shënoi 10 vjetorin e Fatmir Deharit në krye të Komunës. Festa filloi gjatë ditës me lëshimin në përdorim të sheshit të qytetit dhe vazhdoi në orët e mbrëmjes në Qendrën e Kulturës.

Të pranishëm ishin të gjithë bashkëpartiakët e Deharit, përfshirë edhe “Grupin e Zjarrit”. Fatmir Dehari tha se e ardhmja i takon rinisë dhe, siç u shpreh, ata do ta kenë më lehtë gjatë etapave të ndryshme për të prosperuar.

“Uroj që Kërçova shqiptare të mbetet shekullore, të vazhdohet me ide progresive dhe vizion të qartë për të mirën e përbashkët, ashtu siç na do edhe populli edhe Zoti”, tha Fatmir Dehari, kryetar i komunës së Kërçovës.

TV21 pyeti qytetarët se çfarë mendojnë për udhëheqjen 10 vjeçare të Deharit me Kërçovën. Mendimet e tyre ishin të ndara, ndërsa si shqetësim më të madh përmendën ikjen e të rinjve nga vendi.

“Duhet të krijohen vende pune më shumë që të mos ikë rinia, të ndërtojnë fabrika apo çfarë do qoftë”
“Duhet ta punësojë popullin në Kërçovë, e jo të bëjë rrugë”

“Më me rëndësi është rinia dhe arsimi i cili duhet të kualifikohet, që në vegjëli fëmijët dhe në bazë të aftësive të fëmijëve ashtu të shkojnë edhe klasat që të aftësohen për punësim në tregun që do të vijë”

“E ka ndërtuar shumë bukur qendrën dhe kalanë e ka bërë drejt nuk ka qenë asnjëherë kështu si Fatmir Dehari që e ka bërë”
“Janë ndërtuar disa rrugë dhe disa trotuare edhe sheshi është ndërtua, por a është e mjaftueshme për ne që jetojmë këtu dhe për ata që jetojnë jashtë vendit që të kthehen këtu, nuk ka kushte të mira”

Për festën e organizuar nga Komuna, reaguan nga partia opozitare VMRO-DPMNE në Kërçovë, duke thënë se Dehari feston në kohë krize me paratë e qytetarëve për dështimet e tij në këto 10 vite.

“A është krenari 10 mijë qytetarë të zhvendosur për këto 10 vite edhe atë 80% prej tyre janë shqiptarë, këta janë numra zyrtarë zotëri Dehari dhe kjo nuk është krenari por eksod dhe rezultat i qeverisjes tënde 10 vjeçare në nivel lokal dhe 20 vjet në nivel qendror”, theksoi Llaze Jakimovski, kryetarë i VMRO-DPMNE-së dega Kërçovë.

Nga VMRO-ja porositën Deharin të mos harroj se, siç thanë, Kërçova është qytet maqedonas. Ndërsa kryetari i BDI-së Ali Ahmeti në fjalimin e tij porositi Deharin të vazhdojë të ecë përpara, pavarësisht se kush çka flet.

VIDEO:

/tv21