REKORD BOTROR: Kërçova katër dekada pret për spitalin e ri..

E përderisa Kërçova ka 37 vite që e pret spitalin e ri, i vjetri funksionon në kushte nën standarde, ambiente të rrënuara, pajisje të prishura dhe të vjetra, borxh gati 12 milionë euro, përcjell FLAKA.

Për shkak të kësaj, pacientët detyrohen të shkojnë në Shkup ose Ohër për ekzaminime. Repartet e neurologjisë, psikiatrisë, hundës dhe fytit, oftalmologjisë, infektologjisë dhe ortopedisë janë në gjendje të dëshpëruar dhe këtu nuk mund të kryhen as aktivitetet bazë shëndetësore.

Drejtori i spitalit thotë se kemi mjekë, specialistë dhe subspecialistë, por për shkak të kushteve jo të mira të punës nuk mund të dëshmojnë aftësinë e tyre.

Menaxhmenti i spitalit është në kërkim të donatorëve nga sektori i biznesit për të ndihmuar me donacione për rinovimin e ambienteve pasi autoritetet kanë kohë që janë në dijeni për këto probleme por deri më tani nuk ka asnjë reagim.

Vijnë, bëjnë foto, premtojnë, por nuk i përmbushin, për shkak të kësaj situate, mjekët e rinj të punësuar në spitalin e Kërçovës shpejt largohen në kërkim të kushteve më të mira të punës.

Spitali i ri në Kërçovë është në ndërtim e sipër për gati katër dekada. Ndërtimi ka filluar në vitin 1985 dhe sot është vetëm karabina. Qytetarët thonë se ky projekt mund të konkurrojë për një rekord Guinness.

Situata është e ngjashme edhe në lindje. Ndërtimi i Spitalit klinik të Shtipit ka filluar në vitin 2016 dhe ende nuk ka përfunduar, pos kësaj, afatet po lëvizin vazhdimisht dhe më shumë se 200.000 pacientë nga rajoni nuk mund të marrin shërbime më të mira shëndetësore.

/FLAKA