Ahmetistët dhe Grupi i Zjarrit! Dy taborë, një emblemë!A po nis beteja për logon e BDI-së? (VIDEO)
Pas shumë javësh kritika ndaj njëri-tjetrit, mes dy taborëve brenda BDI-së, atij të prirë nga kryetari Ali Ahmeti dhe grupit të zjarrit nga ana tjetër, tash ka nisur të dalë në sipërfaqe çështja e logos së partisë, më saktësisht se kush ka të drejtë ta përdorë.
TV21 ka mësuar se kjo temë është hapur edhe në takimin e fundit që Ahmeti ka pasur me Këshillin Mbikëqyrës të partisë, të cilin e drejton Musa Xhaferi.
Përveç se mësohen se takimi ka qenë i tensionuar, burimet tregojnë se Ahmeti ka kërcënuar se nëse “grupi i zjarrit” i vazhdon tubimet duke e përdorur logon e BDI-së, atëherë në bazë të Statutit do t’i propozojë Këshillit të Përgjithshëm masa ndaj anëtarëve të “grupit të zjarrit”, e pse jo edhe suspendim ose përjashtim nga organet partiake, pasi që sipas Ahmetit, kjo situatë e krijuar po kalon në anarki.
Tash Këshilli Mbikëqyrës duhet që në afat prej 2 javësh të përgatisë raport nëse është thyer ose jo Statuti i partisë nga ana e Grupit të Zjarrit, pas çka raporti do të shqyrtohet duke sjellë edhe një vendim mbi veprimet e të pakënaqurve në parti.
Se kjo çështje ka nisur të përbëjë temë të rëndësishme mes integristëve me sa duket e dëshmojnë edhe deklaratat e mbrëmshme nga grupi i zjarrit, të cilët në takimin në Hasanbeg, nuk e lanë pa e përmendur punën e logos.
“Ne nuk e shohim subjektin tonë, BDI-në, në rrugë të mirë. Se a është emblema apo jo, edhe po të jetë kjo foltore pa emblemë, ju do të na thoni erdhën ata të BDI-së, andaj pak problem është ajo dhe këtë nuk e bëjmë për inate…”, tha Izet Mexhiti, nënkryetar BDI-së.
“Këtu para meje është logoja e BDI-së, sepse kemi akuza nga mediat se ne e keqpërdorim logon e partisë. Duke filluar nga unë dhe të tjerët pas meje, jemi edhe në kohën kur është themeluar kjo parti, kjo BDI, kemi dhënë djersë, kemi shumë emocion, kemi kontribuuar dhe kjo për ne është e shenjtë, prandaj ne këtë e përdorim me shumë krenari dhe kënaqësi”, tha Musa Xhaferi, kryetar i Këshillit Mbikëqyrës në BDI.
Ndonëse gishtin e drejton nga mediat se po e akuzojnë për keqpërdorim të logos,sot kërkuam nga Xhaferi të konfirmojë ose të hedhë poshtë nëse çështja e logos është përmendur në takimin e fundit që ka pasur mes Këshillit Mbikëqyrës dhe kryetarit, por nuk morëm përgjigje prej tij.
TV21 kërkoi qëndrim nga zëdhënësi i BDI-së, Bujar Osmani, por nuk morëm asnjë përgjigje nëse partia do të ndërmarrë diçka rreth këtij përdorimi të dyfishtë të logos dhe se çfarë parasheh Statuti i partisë në këtë rast.
VIDEO:
/tv21
