Asnjë lëvizje te spitali i ri i Kërçovës ! Ku shkuan 1 milionë euro për përfundimin e tij..(VIDEO)
Më 3 nëntor 2022, Qeveria ndau 60 milionë denarë për përfundimin e spitalit të Kërçovës i cili ka filluar të ndërtohet para thuajse 40 vitesh.
Këtë lajm i shumëpritur nga kërçovarët e bëri publik zëvendëskryeministri i parë Artan Grubi, por edhe pse kanë kaluar pothuajse 4 muaj nga ndarja e mjeteve, në teren nuk ka asnjë zhvillim.
Gjithçka është ende ashtu siç ka qenë, i lyer nga jashtë, me tablo gipsi dhe kabllo të lëna nëpër tokë, ndërsa brenda është bërë strehë e qeneve endacakë.
Drejtori i Spitalit, Stanko Trpeski, thotë se nuk kanë kompetenca në ndërtimin e spitalit të ri dhe se edhe këta lajmet i marrin vetëm nga mediat, si gjithë të tjerët, por një gjë e di, se punë në terren nuk ka!
“Kishim një deklaratë se janë ndarë 1 milion euro për ndërtimin e spitalit të ri por për fat të keq në teren edhe pse nuk kemi kompetenca në ndërtimin e tij e shohim se shumë dobët po zhvillohen punët për momentin në ndërtimin e spitalit të ri”, tha Stanko Trpeski, drejtor i spitalit të Kërçovës.
Trpeski madje tha se është përgatitur me kuadër për t’u transferua në objektin e ri sepse ka pasur shumë premtime se do të përfundonte, por tani ka ardhur në një situatë kur ka shumë të punësuar dhe pa kushte të mjaftueshme për punë në objektet ku janë për momentin.
“Vitet e kaluara u përgatitëm se do të hyjmë në spitalin e ri me kushte të reja, punësuam më shumë kuadër medicinal, dërguam në specializim nga të gjitha lëmit një pjesë duhet të kthehen, një pjesë janë kthyer dhe disa janë në pushim lindje.
Megjithatë për fat të keq nuk ka asnjë indicie për t’u transferuar në spitalin e ri”, pohoi Stanko Trpeski, drejtor i spitalit të Kërçovës.
Rikujtojmë se edhe në vitin 2020, ministri i shëndetësisë Venko Filipçe premtoi se do të ndahen 6 milionë euro për spitalin e ri dhe do të përfundohet në vitin 2024, por asgjë nuk u realizua.
Tash mbetet për t’u parë nëse do të fillojnë ose jo punët me 60 milionë denarët e ndara së fundmi, apo edhe ato to të mbeten vetëm një premtim dhe spitali i Kërçovës do të vazhdojë të thyejë rekord për kohëzgjatjen e mos-ndërtimit.
VIDEO:
/tv21
