Maqedoni: Pagat do të rriten, por më vonë..!? (VIDEO)

Punonjësit e Ministrisë së Financave para dy ditëve dolën për të protestuar para godinës së këtij institucioni.

Kjo sepse, sipas tyre, ministri Fatmir Besimi, ka anuluar vendimin për rritjen e pagave të janarit për 30 për qind.

Por Besimi njoftoi se paga minimale do të rritet për 2.200 denarë dhe me këtë do të ketë përmirësim edhe në administratën e shtetit.

“Ministri Besimi i rriti pagat vetëm te Financat, nuk është ashtu. Edhe vitin e kaluar e thamë të njëjtën, ne jemi për zgjidhje sistematike.

Ashtu gjetëm zgjidhje me pagën minimale, me pensionistët edhe me ligjin për administratorët shtetërorë, ku në mesataren e pagës në të gjithë administratën shtetërore, jo vetëm në Financa, hyn paga minimale, përmirësimi.

Në këtë pjesë më nuk duhen të shqetësohen sindikatat sepse me këtë ndryshim ligjor sigurohet integriteti dhe standardi i të punësuarve në administratë, respektivisht, nga marsi, kur do të ketë përshtatje të pagës minimale, që nga 18.000 do të rritet, për shembull për 2.200 denarë shtesë”, tha Fatmir Besimi, Ministër i Financave.

Ministri Besimi sqaroi se paratë në buxhet janë të destinuara pikërisht për rritje pagash dhe se ku do të përfundojnë mund të vendosë vetëm Kuvendi.

“Ne e dimë se si funksionon buxheti. Të vetmit që mund të thonë se ku shkojnë ato para janë deputetët në Kuvend, kur votohet buxheti e dinë se ku shkojnë ato para. Nuk janë paratë e mia personale, nuk janë të një ministri, as të Qeverisë.

Janë para të qytetarëve për të cilat vetëm Kuvendi jep pëlqimin. Buxheti ka fuqinë e ligjit dhe në asnjë rrethanë nuk guxon të cenohet dhe të shpenzohet diku tjetër”, pohoi Fatmir Besimi, Ministër i Financave.

Përndryshe Besimi u pyet se a ka pasur kërcënime ndaj punonjësve të Ministrisë së Financave, të cilët kanë vendosur të shprehin pakënaqësitë e tyre, por ai mohoi të ketë pasur diçka të tillë, duke shtuar se i ka ftuar në takim përgjegjësit e departamenteve për t’i informuar për seancën e Qeverisë.

VIDEO:

/tv21