Kërçovë: Zonja Nafije kërkon ndihmë për nipin e saj jetim..(VIDEO)

Pikëllim, dhimbje dhe varfëri në familjen Musliu në Kërçovë. Kjo është zonja Nafije e cila javë më parë humbi djalin e saj 28 vjeçar, ndërsa i si amanet ja la nipin.

Ata çdo herë kanë jetuar me qira nëpër banesa të ndryshme të Kërçovës.
“Ka dy javë që më ka ndërruar jetë djali, ma ka lënë këtë nipin e vogël amanet, jetojmë me qira, qiraja janë rritur në të gjithë Kërçovën”, tha Nafije Musliu.

Zonja Nafije mes lotësh rrëfen dëshirën e djalit të saj për të pasur një shtëpi të veten për t’ia trashëguar djalit të tij dhe jo ta rris djalin derë e më derë si qiraxhinj, por pasi ndërroi jetë dëshira dhe ëndrra e tij për djalin mbetën të pa realizuara.

Zonja Nafije ka vetëm një ëndërr, ajo është që amanetin ta çoj në vend e djali të pushoj i qetë në botën tjetër.

“Nuk është mirë as për mua që të dal në televizion, nuk është lehtë, por për t’ia plotësuar dëshirën djalit që të jetë i qetë në botën tjetër edhe këtë nipin ta rregulloj edhe unë jam e sëmurë me infarkte me gjëra, i lus njerëzit tanë të më ndihmojnë, këtë sprovë zoti mos ja dhëntë as armikut me këtë dhimbje kam dal para njerëzve”, theksoi Nafije Musliu.

Zonja Nafije tregon se tokën e posedon, ndërsa kërkon nga bamirësit vetëm t’i ndihmojnë të ndërtojë të paktën dy dhoma për nipin dhe renë.

“Shtëpinë e kërkoj për këtë nip dhe për nusen të jenë të qetë sepse nusja më thotë unë nuk martohem asnjëherë që ta lë djalin në dorë të tjetër kujt, më thotë mami dua të jesh afër meje që djali në botë tjetër të jetë I qetë.

Nuk e di nuk e di këtë dhimbje Zoti askujt mos ja dhëntë kjo është një dhimbje që nuk mund ta përballosh, por do të bëhem e fortë vetëm për këtë djalë se ma ka lënë amanet”, tha Nafije Musliu.

Zonja Nafije tregon se e ka të vështirë të dal përballë njerëzve për të kërkuar ndihmë, por si mundësi të vetme për të ndihmuar nipin e sheh këtë mënyrë duke mbajtur shpresa të pafundme se bamirësit do t’ia zgjasin dorën.

VIDEO:

/tv21