Vendet më të sigurta për të udhëtuar ndër ta dhe Zvicra..

Po kërkoni një udhëtim të qetë në vitin 2023?
Për shumë udhëtarë, siguria është një nga faktorët më të rëndësishëm për zgjedhjen e një destinacioni.

Ndërprerja e udhëtimeve gjatë pandemisë i ka bërë shumë prej nesh më të kujdesshëm kur zgjedhim për të vizituar vende të reja.

Një përmbledhje vjetore nga kompania amerikane e sigurimit të udhëtimeve, Berkshire Hathaway Travel Protection (BHTP), zbulon 15 vendet më të sigurta për të udhëtuar në vitin 2023 – duke përfshirë 11 prej tyre që ndodhen në Evropë. Megjithatë, disa vende si Finlanda, nuk u përfshinë në vlerësime, raporton Euronews, shkruan Monitor.

Përtej Evropës, Australia (e 4-ta), Kanadaja (e 6-ta), Zelanda e Re (e 10-ta) dhe Emiratet e Bashkuara Arabe (të 13-tat) ishin gjithashtu pjesë e listës, transmeton albinfo.ch.

Këto janë 11 vendet evropiane që u bënë pjesë e renditjes.
Relaksohuni me një birrë në Belgjikë

Belgjika është një nga vendet më të sigurta në botë, duke u renditur në vendin e 15-të në listën BHTP dhe në vendin e 22-të për sa i përket GPI-së.

Cili mund të ishte problemi më i madh për ju? Kaloritë e shumta. Thjesht mos konsumoni birrën dhe çokollatën dhe përqendrohuni te shtëpitë e kutive të çokollatës së Bruges.

Eksploroni Mbretërinë e Bashkuar
Pse të mos e kaloni vitin 2023 duke eksploruar Ishujt Britanikë, nga bregu verior i Skocisë e deri te plazhet ranore të Cornwall?

Britanikët që kërkojnë një destinacion të sigurt pushimesh mund të konsiderojnë vendin e tyre, pasi Mbretëria e Bashkuar u rendit e 14-ta si shteti më i sigurt në botë, nga vendi i 18-të që ishte vitin e kaluar. Gjithashtu, ajo renditet e 34-ta për sa i përket GPI-së.

Qetësi në peizazhet e gjelbra të Irlandës
Megjithëse ka rënë pak nga renditja, Irlanda është ende e 12-ta nga 15 destinacionet kryesore në listën vjetore të BHTP për vendet më të sigurta në botë.

Gjithashtu, ajo renditet si vendi i tretë për sa i përket GPI-së dhe ka një vlerësim të Nivelit 1 nga SHBA.
Shijoni të qetë diellin e Spanjës

Spanja është një nga destinacionet më të njohura të pushimeve në botë dhe, për fat të mirë, është gjithashtu një vend mjaft i sigurt.

Ajo renditet e 11-ta në listën e vendeve më të sigurta në botë sipas BHTP dhe është në 30 më të mirat për sa i përket GPI-së.
Përjetoni freskinë e maleve të Zvicrës

Zvicra mund të tërheqë udhëtarët që kërkojnë destinacione të sigurta, falë niveleve të ulëta të krimit dhe rreziqeve minimale për turistët.

Vizitorët mund të eksplorojnë majat alpine të vendit dhe liqenet vezulluese e të qeta.
Nisni rrugën tuaj drejt relaksit në Suedi

Suedia zë vendin e 8-të në renditjen e BHTP-së, nga e 4-ta në vitin 2022. Ajo gjithashtu renditet e 26-ta për sa i përket GPI-së.

Për t’u ndier plotësisht të qetë, përgatitni kafenë në një sobë në natyrë ose provoni prerjen “terapeutike” të druve, duke përfituar kështu edhe disa rezerva për ngrohjen falas të shtëpisë tuaj.

Përjetoni qetësinë dhe kulturën e Gjermanisë
Gjermania renditet në vendin e 7-të në listën e BHTP – nga vendi i 9-të që ishte vitin e kaluar – dhe e 16-ta për sa i përket GPI-së.

Kjo do të thotë që ju mund të eksploroni me lehtësi rrugët plot me art të Berlinit dhe tavernat e birrës në Bavari.

Qëndroni nën tingujt e heshtjes në Norvegji
Norvegjia zë vendin e 5-të në listën e BHTP-së dhe të 17-tin për GPI.

Vendet skandinave janë ato më paqësoret në botë dhe Norvegjia nuk bën përjashtim. Shijoni qetësinë e akullnajave dhe mbani frymën për të përjetuar Dritat e Veriut.

Gjeni paqen tuaj në Islandë
Islanda u rendit e treta në listën e BHTP për vendet më të sigurta ku mund të udhëtoni në vitin 2023, duke zbritur nga vendi i parë që ishte vitin e kaluar.

Pavarësisht rënies së lehtë në renditje, ky shtet i Evropës Veriore vazhdon të jetë më paqësori në botë sipas GPI.

Ishulli nordik do t’ju ndihmojë të udhëtoni në qetësi me peizazhe mahnitëse natyrore të vullkaneve, burime të nxehta, gejzerë dhe fusha të lavës.

Zbuloni qytetin më të sigurt në botë në Danimarkë
Një tjetër vend skandinav bëhet gjithashtu pjesë e listës.

E renditur e dyta sipas BHTP, Danimarka është një nga shtetet më të sigurta në botë dhe, si një bonus shtesë, Kopenhaga u rendit e para në Indeksin e Qyteteve të Sigurta për vitin 2021.

Kjo do të thotë që udhëtarët mund të ndihen plotësisht të relaksuar teksa admirojnë pallatet mbretërore në kryeqytet dhe statujën ikonë të “Sirenës së Vogël”.

Ngisni biçikletën në Holandë
Ju mund të ndiheni të sigurt për të udhëtuar pa shqetësime në Holandë, shteti i cili renditet i pari në listën e BHTP për vendet më të sigurta dhe i 21-ti për GPI. Këtu mund të shijoni fushat e tulipanëve dhe të lëvizni me biçikletë në kryeqytet.

/albinfo