A mund të hyjmë në BE deri në 2030-tën? Ja çka thotë presidenti i Maqedonisë..! (VIDEO)

Që të ketë anëtarësim në BE duhet të dyja palët të punojnë në këtë drejtim, gjegjësisht Maqedonia të punojë mbi reformat, ndërsa Unioni të përqendrohet në integrimin, jo vetëm të vendit tonë, por të të gjithë rajonit.

U shpreh Presidenti, Stevo Pendarovski në debatin “Ballkani Perëndimor ndërmjet Perëndimit dhe Lindjes, Maqedonia – anëtare e BE-së deri në vitin 2030”.

Ai shtoi se interesi gjeostrategjik i BE-së ndaj Ballkanit Perëndimor është duke u përforcuar pas luftës në Ukrainë.

E nëse ka gjasa që në BE të hyjmë deri në vitin 2030, Pendarovski tha – po, është e mundur, por megjithatë duke lënë disa dilema.

“Së pari, nuk e di nëse do të sigurojmë konsensus kombëtar për këtë çështje, për momentin nuk e kemi. Domethënë, po flas për një konsensus real, jo retorik.

A do ta sigurojmë dhe a do ta ruajmë, sepse duhet ta ruani për vite derisa zgjasin negociatat. Dhe së dyti, nuk e di nëse Bashkimi Europian edhe pas përfundimit të luftës në Ukrainë do ta ketë fokusin mbi këtë rajon”, pohoi Stevo Pendarovski, president.

Euroambasadori Dejvid Gir konfirmoi se pushtimi rus ndaj Ukrainës shkaktoi impuls të ri te BE-ja në lidhje me procesin e zgjerimit, gjë që Maqedonia duhet ta shfrytëzojë. Megjithatë, rikujtoi se për procesin e negociatave duhet të realizohen ndryshimet kushtetuese që, siç theksoi, nuk e cenojnë identitetin maqedonas.

“Është e qartë se me qëllim që të shfrytëzohet impulsi në procesin e negociatave aderuese, ndryshimet brenda Kushtetutës duhet të ndodhin. Kjo do të mundësojë që procesi të vazhdojë me hapjen e kapitujve.

Sa i përket çështjes për identitetin e pakicave dhe e njëjta nuk ka të bëjë asgjë me identitetin e shtetit, nuk e humbni identitetin, gjuhën, historinë, në rrugën drejt BE-së”, pohoi Dejvid Gir, ambasador i BE-së në RMV.

Zv/kryeministri për çështje europiane Bojan Mariçiq, tha se nuk duhet pasur dilemë nëse ne duhet të jemi pjesë e BE-së sa më shpejtë që është e mundur, por se për këtë duhet konsensus politik nga të gjitha partitë politike.

“Ka dy dimensione kur me të vërtetë duhet të tregoni se jeni për BE-në. Së pari, zgjidhim çështje të vështira me fqinjët që një kohë të gjatë na mbajtën duke pritur para dyerve të BE-së, pa arsye, po pajtohem.

Dhe pyetja e dytë, është nëse duam që pas 30 viteve nga pavarësia ta ndryshojmë mënyrën e udhëheqjes së politikave, ekonomisë, diplomacisë, institucioneve, etj”, tha Bojan Mariçiq, zv/kryeministër për Çështje Europiane.

Maqedonia i nisi negociatat me BE-në në koprik të vitit të kaluar me mbajtjen e konferencës së parë ndërqeveritare, por për vazhdimin e tyre, përkatësisht, për klasterët, kjo çështje u kushtëzua nga ana e Bullgarisë me futjen e bullgarëve në Kushtetutë.

VIDEO:

/tv21