Agjentët e BIA-s dhe GRU-së ruse në veri! Ndizet alarmi për Kosovën, paralajmërohet skenari..

Kur tensionet mes Kosovës dhe Serbisë vazhdojnë të jenë në rritje e sipër, Ministri i Brendshëm i Republikës së Kosovës, Xhelal Sveçla ka deklaruar se në pjesën veriore të Kosovës ka persona të shërbimeve sekrete, si ai serb i njohur si BIA, dhe ai rus GRU.

“Kemi informata se elemente të BIA-s organizojnë grupet e ekstremistëve, edhe GRU-ja është aty. Ka edhe ekstremistë aty.

Qeveria e Serbisë punon për të minuar sovranitetin dhe integritetin e Kosovës qoftë në aspektin diplomatin apo në shkelje të ligjit në Kosovë, duke mobilizuar dhe organizuar grupe kriminale”, tha Sveçla.

E në veri të Kosovës janë parë edhe persona të uniformuar, ku në rrobat e tyre është i vendosur flamuri rus, ndërsa në njërin krah simboli i një shqiponje që po ashtu është shenjë identifikuese ruse.

Siç kanë raportuar media të ndryshme, numri i këtyre personave që janë futur ilegalisht në Kosovë shkon deri në 300 veta, të cilët kryesisht prejardhjen e kanë nga Rusia dhe Serbia.

Shala paralajmëron rrezik nga skenari serb
Për krejt këto zhvillime në veri të Kosovës, eksperti i sigurisë, Drizan Shala thotë se kjo pjesë e Kosovës është shndërruar në oazë të krimit të organizuar.

“Veriu i Kosovës është oazë e krimit të strukturuar, e cila që nga paslufta ka marrë formën e saj “institucionale” duke penguar në çdo formë autoritetet e sigurisë të gjejnë zbatueshmëri në atë pjesë”, thotë Shala.

Sipas tij, këto struktura kriminale janë duke vepruar me mbështetjen e Serbisë dhe Rusisë.
“Institucionet e Kosovës nga shpallja e pavarësisë deri te shtrirja e autoritetit të saj në pjesën veriore, në atë pjesë kanë vepruar strukturat të ndryshme të sigurisë së shtetit të Serbisë dhe të Rusisë, duke mos u penguar asnjëherë nga ata, dhe në këtë aspekt pas 2011 institucionet tona filluan që të formojnë strukturën e saj shtetërore përmes inkorporimit të strukturave paralele në kuadër të PK-së, si dhe filloi zbatimi i veprimeve policore deri në nivelin e komandantëve të stacioneve e asnjëherë deri te niveli rajonal apo më gjerë”, shprehet Shala për “Bota sot”.

Sipas Shalës, personat e uniformuar janë vërejtur edhe në korrik të vitit 2022, kur Kosova i vendosi reciprocitet për targat Serbisë, çka çoi në rritjen e tensioneve mes Kosovës dhe Serbisë, dhe serbët lokal bllokuan rrugët në veri të Kosovës.

“Deklarimi që në atë pjesë ka struktura është vërejtur më së miri në korrik të 2022, ku pati persona të maskuar dhe të uniformuar edhe të armatosur që kanë lëvizur pa asnjë problem dhe pengesë në atë pjesë duke penguar dhe sulmuar policinë e Kosovës”, deklaron Shala.

Eksperti i sigurisë, Drizan Shala, për gazetën “Bota sot” ka treguar edhe dy qëllimet kryesore, të cilat, sipas tij, i kanë pjesëtarët e BIA-s dhe GRU-së në veri të Kosovës.

“BIA dhe GRU-ja i kanë dy qëllime, ku e para ka detyrë primare pengimin e institucioneve tona në veri duke shantazhuar, kërcënuar çdo kënd që ndihmon institucionet e Kosovës, ndërsa e dyta ka qëllimin primar veprime të formës së sulmit, sabotimit dhe cenimit të rendit kushtetues duke u konfrontuar me institucionet e sigurisë me karakter gjeostrategjik/politik”, thekson Shala, i cili shton se Kosova gjendet përballë një skenari serb që mund të zbatohet nga momenti në moment.

Sipas tij, orët e ardhshme janë të rrezikshme dhe se duhet pasur kujdes të shtuar institucionet tona.

“Kosova duhet të jetë vigjilente në orët në vazhdim, sepse tanimë kemi para vetit një skenar që do mund të zbatohet nga momenti në moment, duke bllokuar atë pjesë nga ndikimi pozitiv i nivelit qendror të Kosovës nga këto struktura kriminale institucionale të Beogradit”, përfundon për “Bota sot”, eksperti i sigurisë, Drizan Shala.

Veriu i Kosovës, çerdhe e kriminelëve serb dhe agjentëve rus
Kurse ish-agjenti i SHIK-ut, Naim Miftari, thekson se veriu i Kosovës që nga viti 1999 vazhdon të jetë çerdhe e kriminelëve serb.

“Veriu i Kosovës që nga marrëveshja ushtarake e Kumanovës 1999 në mes të NATO-s dhe Serbisë, është shndërruar në çerdhe të kriminelëve serb të luftës nga tërë ish-Jugosllavia dhe në çerdhe të kriminelëve kontrabandues, dhe këtë lojë e kanë luajtur mbi 20 vite Serbia, KFOR-i francez domethënë shërbimi sekret francez DGSE dhe Hashim Thaçi, Kadri Veseli, Agim Çeku, SHIK-u, dhe shumë kryeministra e qeveritar të tjerë shqiptar që kurrë veriu i Kosovës nuk iu ka interesuar me sundu ligji pasi shumica kanë pas fitime nga kontrabanda e naftës, cigareve, barnave, armëve, drogës, prostitucionit, alkoolit…..!”, thotë Miftari.

Sipas tij, në veri përveç anëtarëve të BIA-s serbe, janë të strehuar edhe agjentët rus.

“Sot është e vërtetë se në veri ka kriminelë e banda serbe të BIA-s dhe pjesëtarë të GRU-së, të FSB-së ruse dhe në veri kohëve të fundit po paraqiten edhe gazetar-agjentë rus, por së fundmi edhe deputet të lëvizjeve fashiste në Evropë dhe të Francës, siç ishte para disa ditësh që deputeti francez provokonte hapur Kosovën”.

Më tej, Miftari deklaron se Serbia mund të provokoj konflikt të armatosur në veri të Kosovës, për çka duhet të ketë kujdes Kosova.

“Deklarata e ministrit Sveçla është tregues real se ka rrezik, por Serbia dhe Rusia munden të provokojnë konflikt-luftë në veriun e Kosovës vetëm nëse atë luftë e ndihmojnë dhe e mbështesin në hije vet disa shtete të NATO-s në këtë rast sidomos Franca, e cila hapur nga qershori 1999 e mbështeti Beogradin dhe bandat serbe në veri.

Nuk ishte një koordinim i rastësishëm Parisi me Beogradin, Thaçin, Veselin, Çekun… pastrimi etnik i ndodhur natën e 2 shkurtit 2000, kur u ndoqën e u plagosën, e u vranë dhjetëra e qindra shqiptar dhe u ndoqën shumica e shqiptarëve nga veriu, para syve të NATO-s dhe sot, shtetet si Rumania, Spanja, Greqia, Sllovakia… nuk e pranojnë vendin tonë si shtet”, nënvizon Miftari.

Sipas Miftarit, pavarësisht përpjekjeve serbo-ruse, SHBA-të dhe Britania e Madhe nuk do ta lejojnë një konflikt të armatosur, apo aventurë serbo-ruse.

“Pra, luftë mund të ketë vetëm nëse Serbinë dhe Rusinë e mbështesin në hije disa anëtare të NATO-s, por besoj në Amerikën, Gjermaninë dhe Britaninë se nuk do të lejojnë të ketë aventura në Kosovë sikurse lejuan të ndodhte pushtimi dhe lufta në Ukrainë!”, përfundon për “Bota sot”, ish agjenti i SHIK-ut, Naim Miftari.

/lajmpress