Çerdhja e Kërçovës hap dyert për fëmijët mërgimtarë.. (VIDEO)

Në Komunën e Kërçovës, këtë vit për herë të parë hapet çerdhja edhe për fëmijët e mërgimtarëve për periudhën që janë në vendlindje.

Kjo erdhi si ide me qëllim të afrimit dhe socializmit me bashkëmoshatarët e tyre të cilët qëndrojnë në këtë çerdhe.

Grupmoshat prej 4 deri në 6 vjet do të kenë mundësi të ndjekin edhe mësim në gjuhën shqipe për periudhën që do të qëndrojnë në çerdhen e Kërçovës.

“Qëndrimi ditorë do të jetë deri në ora 16:30, do të mësojnë në gjuhën shqipe, do të realizojnë aktivitete si të gjithë fëmijët tjerë. Do të jenë bashkë, nuk do të jenë të veçuar në një tjetër, do të jetë grup homogjen prej moshës 4 deri në 6 vjet.

Tua hapim dyert mërgimtarëve të mos jemi bashkë vetëm nëpër ahengje, rrugë apo dasma familjare, mirëpo të jemi edhe në mënyrë institucionale bashkë sepse ata kontribuojnë për këtë vend”, tha Sadik Ahmeti, drejtor i çerdhes.

Prindërit mërgimtarë e përshëndesin këtë nismë dhe thonë se aktivitete të këtij lloji duhet të organizohen çdo herë kur ata vijnë në vendlindje.

“Shpresojmë që kështu aktivitete të ketë edhe në të ardhmen më shumë, sepse fëmijët e mërgimtarëve kanë nevojë të njihen me traditën me kulturën e këtij vendi, të kenë bashkëpunim me fëmijët”, tha një prind.

E kjo vogëlushe është Edlira e cila jeton në Zvicër, por siç thotë ajo shpirtin e ka në vendlindje. Ajo i ka realizuar dy këngë kushtuar kurbetit dhe atdheut, dhe ka marr vendin e parë në një festival ndërkombëtar.

“Unë jam Edlira Dalipi dhe këndoj shqip, unë jetoj në Zvicër dhe e kam marr vendin e parë në festival”, tha një fëmijë.
Në kuadër të kësaj po përgatitet edhe një koncert me fëmijët e mërgimtarëve të cilët do të kenë mundësi të këndojnë e ta shijojnë pushimin në vendlindje.

VIDEO:

/tv21