Kërçovë asfaltohet rruga “Uzhiç­ka”.. (VIDEO)

Filloi rikonstruimi i rrugës “Uzhiçka” në Kërçovë. Gati 10 muaj në këtë rrugë banorët kanë ecur nëpër baltë.

Disa muaj më parë kur TV21 vizitoi këtë lagje, banorët shpreheshin të revoltuar nga situata e krijuar në këtë rrugë e cila është mjaftë e frekuentuar.

Banorët përshëndesin punimet edhe pse siç thonë ata po zhvillohen me dinamikë shumë të ngadaltë. Ata njëkohësisht kërkojnë edhe pastrimin e kanalit rreth rrugës.

“Këtu rruga është bërë me kanal ku ka mjaftueshëm mbeturina. Gjithë ato mbeturina janë aty dhe kjo është potencial, të them popullorçe është bombë më e rrezikshmja për qytetin, jo vetëm për ne këtu që gravitojmë në këtë lagje, por për të gjithë sepse tani temperaturat do ta bëjnë të veten dhe gjithë mbeturinat që hidhen afër kontejnerëve i gjuajnë aty, ka bretkosa, gjarpërinj dhe gjithçka“, tha Gulab Sarafillovski, banor.

Në këtë lagje ka kontejner kolektiv, të cilët sa herë që të kalosh janë të stërmbushur dhe me mbeturina përreth, me çka kundërmon erë e keqe.

“Mbeten një problem i madh mbeturinat të themi popullorçe, plehrat që i hedhim ne qytetarët këtu kemi nevoja të ndryshme megjithatë komunaleci të mos e ofendojmë por shumë dobët po e kryejnë punën e tyre nga e cila marrin pagë, kontejnerët të cilët i shihni këtu janë të stërmbushur dhe nuk janë të pastruar, sepse në një kontejner mbledhin rreth 1kub metër hedhurina”, theksoi Gulab Sarafillovski, banor.

Nga Ndërmarrja Komunale ditë më parë njoftuan se pas rikonstruimit të rrugës ndërmarrja Komunale e Kërçovës do t’i largojë nga rruga kontejnerët kolektiv. Do të kërkojë nga banorët që të sigurojnë kontejnerë individual nëpër shtëpitë e tyre, që më pas Ndërmarrja Komunale t’i mbledh. Banorët i thanë TV21 se ky vendim është i mirëpritur dhe presin që sa më shpejtë të fillojë të zbatohet dhe të mos mbetet vetëm premtim në letër.

Fatmir Dehari nëpërmjet një statusi në facebook këtë e quajti projekt madhor dhe e cilëson si rrugë me standard dhe pamje Evropiane. Ndërsa banorët kërkojnë vijëzimin e rrugës dhe jo vendosjen e policëve të shtrirë në rrugë.

VIDEO:

/tv21