Koha e ikjes së rinis, simbol i mjerimit dhe varfëris…! Shkruar nga Mr. Nexhat Mehmedi

Dita-ditës bëhet domosdoshmëri që rina të braktisë vendlindjen, atdheun e të marrë rrugën e mërgimit. E gjithë kjo është pasojë e papunësisë dhe pagave të ulta që të rinjtë s e përballojnë dot jetën e tyre, pra e gjithë kjo është simbolikë e mjerimit dhe varfërisë.

Para disa ditësh duke pirë kafen e mëngjesit me një mikun tim, tepër i shqetësuar dhe i revoltuar nga largimi i rinisë për në mërgim me lot në sy po më tregonte për dy djemtë e tij të diplomuar e pa punë më tha:

Hasan Prishtina e kish shkrirë pasurinë e tij për shqiptari!… kurse sot politikanët tanë po shesin çdo gjë vetëm e vetëm për t’u pasurua vetë e për popull e rini s’ ju intereson fare.

Ndaj edhe kryefjala e këtij shkrimi ka të bëjë me dukurinë negative politike- shoqërore, që në vijimësi ashtu pamëshirshëm e shkrin kombin dhe e rëndon zhvillimin e vendit, sot dhe në të ardhmen.

Një gjë duhet ditur mirë e mirë se për këtë rinl duhet të gjithë të mbajmë përgjegjësi e në veçanti pushtetarët tanë që u votuan po nga kjo rini.

Dhe sot politikanët dhe partitë politike nuk kanë të drejtë që të manipulojnë me rininë dhe popullin e tij,në asnjë mënyrë nuk kanë të drejtë t’i paragjykojnë të rinjtë pse e braktisin vendin se këta djem nuk u larguan nga vendlindja për qejfin e tyre, por nga mosrespektimi i profesionit të tyre, sepse numri më i madh i të diplomuarëve në vend që të punojnë në profesionin e tyre të kryer, ata punojnë kamarierë, magazinierë, muratorë, punëtorë krahu, ëmbëltorë e çka mos, vetëm e vetëm për të egzistuar, ku e gjithë kjo ishte dhe është shpërblim e dhuratë e shoqërisë dhe pushtetarëve tanë!

E gjithë kjo harresë dhe e gjithë kjo heshtje prej varri e politikanëve dhe pushtetarëve dhe e gjithë kjo retorikë boshe, i gjithë ky shqetësim i rremë sa i përket ikjes së të rinjve, besoj se nuk i nderon ata që nuk kanë perspektivë të afërt e të qartë! Dhe, kur rinia nuk gjen rrugëdale atëherë merr rrugën e mërgimit.

E ti miku im i bisedës pavarësisht se çfarë profesioni ke ti dhe të gjithë ne s kemi të drejtë t’i ndalojmë të rinjtë të mos largohen nga vendlindja në këtë kohë mjerimi dhe varfërie, sepse ata, shumica me diploma e fakultete të kryera, magjistra e doktora nuk meritojnë të jenë hyzmeqarë të politikës së çmendurisë, sepse kjo shoqëri politike nuk do apo nuk ka aftësi ta kuptojë shpejt e drejt gjendjen shpirtërore të të rinjve që ikin dhe të tjerëve që përgatisin strajcën e kurbetqarit.
Vlerësoni vetë se kujt do t’ i mbes turpi sepse për lëvdata nuk ka vend…!

Shkruar nga Mr. Nexhat Mehmedi.

/ms