Kërçovë: Vjedhja e €100.000 pa epilog gati 5 vite.. (VDIEO)

Në episodin e dytë të storjes me vjedhjen me vlerë rreth 100.000 eurove, vjedhje e cila u bë në vitin 2017 në Kërçovë, TV21 ka punuar në sigurimin e dokumenteve dhe informacionet se deri ku është lënda në fjalë.

Pas vjedhjes, lënda është dërguar për përpunim në Prokurorinë Themelore të Gostivarit, ndërsa udhëheqës i lëndës ka qenë prokurori Ahmet Ahmeti.

“Ahmet Ahmeti ka qenë prokuror publik në Gostivar i cili më thoshte se lëndën e punoj unë edhe krejt është në rregull krejt dihet të gjitha informacionet që i ka ditur ai mi ka treguar, unë nuk flas me sipas mendjes time, të gjithë janë informacione të atij“- thotë Safet Adili, i dëmtuari.

Pas deklaratës së të dëmtuarit Safet Adili, TV21 u mundua të kontaktonte më prokurorin Ahmet Ahmeti për të na sqaruar se përse për lëndën nuk u soll asnjë epilog, por nuk morëm asnjë përgjigje.

Në vitin 2021 pas publikimit të disa informacioneve lënda është kthyer në prokurorinë e Kërçovës, për përpunim. Adili thotë se hera e parë kur e kanë ftuar të jap deklaratë ka qenë në vitin 2021, ndërsa pohon se lënda e kthyer nga Gostivari nuk ka pasur asnjë dokument.

“Lënda është punuar në Gostivar, krejtësisht, në Gostivar që ka pas të dhëna prej policisë se kush janë çka janë, por kur kthehet lënda në Kërçovë kthehen vetëm papka bosh, pa dokumente, dokumentet e mija janë fshehur.

Kush ta tha këtë se lënda nuk i ka dokumentet brenda?
Këtë ma ka thënë Manka Janeva prokurorja publike e Kërçovës, që lënda është kthyer prej atje por nuk ka asnjë dokument në brendinë e saj”- pohon Safet Adili.

Edhe për këtë TV21 kërkoi qëndrim nga prokuroria e Kërçovës, se a është e vërtetë se lënda nga Gostivari është kthyer pa dokumente, pa shenjat e gishtërinjve dhe pa informacionet për përgjimin e telefonatave të cilat i ka kërkuar vetë Prokuroria e Gostivarit nga kompanitë e komunikimit në Maqedoni. Por nga atje shkurt na thanë se nuk do të na japin informacione të këtilla.

“Prokuroria Publike nuk është në gjendje të japë detaje për veprimet e ndërmarra dhe provat e siguruara gjatë procedurës para hetimore. Siç ju sqaruam në përgjigjen e dorëzuar paraprakisht, rasti është duke u zhvilluar kundër një autori të panjohur, përkatësisht deri më tani nuk është identifikuar asnjë i dyshuar”- thonë nga Prokuroria Publike Kërçovë.

Pas kësaj me kërkesë të të dëmtuarit Safet Adili lënda është dërguar në Këshillin e prokurorëve të lartë, e në prill të këtij viti Adili ka marr një njoftim me shkrim se sapo të shqyrtohet lënda do ta njoftojnë të njëjtin. Por TV21 mëson se lënda është kthyer sërish në prokurorinë e lartë të Gostivarit për shqyrtim.

TV21 u mundua të kontaktoj me prokurorin Islam Abazi por nga i njëjti nuk morëm përgjigje. Pas publikimit të lajmit mësojmë se lënda sërish nga Prokuroria e lartë e Gostivarit është kthyer në Këshillin e Prokurorëve në Shkup.

VIDEO:

/tv21