Hajdeni të festojmë njerëz ! nga Dr.Prof Arbër Çeliku

Lajme nga Maqedonia

Për Sopotin, Brodecin, Lagjen e Trimave dhe të tjerat si këto ndër dekada
Për djegien e njerëzve të pafajshëm radhazi;
Për degradimin e arsimit, sportit, kulturës, shëndetësisë në retrospektivë;
Për dëbimin masiv të rinisë shqiptare si në kohën e Titos dhe Rankoviqit;

Për ajrin e ndotur që thithim përditë e më shumë;
Për ambientin e përdhosur dhe qentë e shumtë endacakë në oborret tona;
Për rritjen drakonike të çmimeve dhe varfërimin tonë kolektiv;

Hajdeni të festojmë njerëz!
Si orkestra e Titanikut para përmbytjes;
Rrokni dajret e çiftelitë!
Daullet po na presin në sheshin e Tetovës e Shkupit

Vallen po na e heq Dovleti në stilin e tij të gjelit kikirec
Krah për krah me miletin që sonambul po ec
Nxirrni nagantat nga brezi dhe namin bëni
Ta martojmë Don Kishotin me Dylqinenë e Tobozës
Qerosi dhëndër e bën Natën e Madhe
Me kopila të vazhdojë të na e mbushë lëmën

Hajdeni të festojmë njerëz!
I madh e i vogël dilni në sokak
Krenarinë e kemi hak
Paradë të shfaqim të Pazari i Grave
Te veshur me dimija si për dasëm

Me gjerdanë floriri kat me kat për qafe
Temena duke i bërë Ago Babës nga toka
Dorën t’ia puthim për shkopinjtë që na i dha
Në kurrizin tonë që u lakua, por nuk u thye kurrë

Hajdeni të festojmë njerëz!
Dehuni me salep siç dhe e kemi zakon
Shotën ta vallëzojmë gjithë qallam
Jashaaaa

Te bërtasim gjithë natën e lume
Derisa hoxha sabahun ta këndojë
E të falet për shpirtin tonë
Nga një dua ta thotë për çdonjërin prej nesh
Subanallah! Subanallah!

Hajdeni të festojmë njerëz!
Me Tatën e Madhe krah për krah
Në çarshinë e Vjetër të Shkupit tonë heroik e legjendar
Aty ku Hasan Prishtina po mrizon nën hijen e rrokaqiejve të mafisë urbane

Hajdeni o njerëz!
Msyejani me të madhe!
Koha tamam për festë është
Para se shpirt me dhënë
Të dehemi dhe kërcejmë deri në agim
Në emër të krenarisë
Që nuk e arritëm kurrë si komb
Urime o popull i heshtur
Gur varri

Statujë e nemur
Që nuk bën zë as kur dinjitetin ta përdhosin
Urë bëhesh të të shkelë këmba e çdo xhahili
Madje dhe krenar ndihesh për këtë
Prandaj, festoni!
Sa të mundeni
Mos ndaleni!

Dilni e legjitimoni prore bastardimin e dy dekadave
Dhashtë Zoti e mbërrijmë edhe një
Ndonëse mendja hiç s’ma do
Dilni festoni!
E kemi sjellë
Doruntinën me pajë e koçi
Amaneti i shenjtë është
Për hajr o popull!
Inshallah!