Zaevi për maqedonasit “tradhëtar” e për shqiptarët “mashtrues”..

Ish kryeministri dhe ish kryetari i LSDM-së, Zoran Zaev, erdhi në krye të Qeverisë me plotë energji e përpjekje për të bërë ndryshime drastike në dobi të shoqërisë, me fillim të mbarë e përfundim fatal.

Ardhja e tij në Qeveri ishte me përplot sakrifica e sfida, vështirësi e pengesa, i përgjakur, por i vendosur për destinacionin përfundimtar, ulësja e kryeministrit. Në Qeveri hyri për dritare, ndërkaq doli për dere. Duke u bërë edhe kryeministri i parë në historinë e vendit që dha dorëheqje nga pozita e kryetarit të Qeverisë, shkruan Zhurnal.

Zaev dha dorëheqje pas humbjes në zgjedhjet lokale, duke e zhytur Maqedoninë e Veriut në krizë politike, ku vendi u fut në një fazë të re të paqëndrueshmërisë politike pasi që Zaev kishte njoftuar dorëheqjen e tij pas humbjes së rëndë të Lidhjes Social Demokrate të Maqedonisë (LDSM) në zgjedhjet lokale të tetorit të 2021.

“Unë marr përgjegjësinë për rezultatin e këtyre zgjedhjeve dhe prandaj po jap dorëheqje si kryeministër dhe si kryetar i Lidhjes Social Demokrate”, tha Zaev gjatë një konference për shtyp në selinë e partisë.

Njoftimi erdhi pasi u bë e qartë se partia kryesore opozitare, nacionaliste VMRO-DPMNE, e udhëhequr nga pasuesi i Nikolla Gruevskit, Hristijan Mickovski, fitoi të paktën gjysmën e 80 komunave të vendit, ndërsa socialdemokratët e Zaev fituan më pak se 20 komuna. Rezultati shënon një kthesë të madhe në skenën politike të Maqedonisë së Veriut, pasi katër vite më parë, socialdemokratët kishin fituar 57 komuna dhe VMRO-DPMNE vetëm pesë.

Ndryshim drastik e historik, kjo krejt pasi që Zaev kishte premtuar shumë e ka realizuar pak, si pasojë e zhgënjimit dhe mashtrimit, e po ashtu edhe si pasojë e asaj që te nacionalistët maqedonas u shpall “tradhtar” pasi Marrëveshjes së Prespës me Greqinë. Marrëveshje e cila ia ndryshoi emrin shtetit dhe e Maqedonia e Veriut u bë anëtare në NATO.

Rezultatet e zgjedhjeve lokale të vitit kaluar 31 tetor ndikuan që Zaev të mbajë premtimin e dhënë me çka dha dorëheqje nga kreu i partisë dhe i Qeverisë. U lakuan emra të ndryshëm figura të njohura e të pa njohura se do ta marrin timonin e qeverisë, por u dëshmua se njeriu më i besueshëm i Zaev kishte qenë Dimitar Kovaçevski. Pasi ky i fundit u zgjedh në krye të partisë LSDM, dhe iu dha mandati për formimin e qeverisë.

Në momentet më delikate në vend ku revolta qytetare ishte rritur nga qeverisja e regjimit të atëhershëm, Zaev si duket zbuloi sekretin e fitores në zgjedhje, duke marrë në parti disa prej shqiptarëve që ishin figura publike, për të hapur edhe shqiptarët dyert e për të mirëpritur Zaevin si personi që e ka “shkopin magjik” për të përmirësuar jetën e qytetarëve.

Përpos kësaj ai në dy palë zgjedhjesh garoi me një koncept të ri të pa dëgjuar më parë që u bë një ndër sloganet më të dëgjuar në çdo cep të vendit “edno opstestvo za site” apo “një shoqëri për të gjithë”. Por, sa arriti ta përmbush këtë slogan gjatë mandatit të tij?

Ideja e sloganit rezultoi e suksesshme pasi fitoi në dy palë zgjedhjesh, por realiteti ishte ndryshe sepse në Maqedoninë e Veriut sërish populli shqiptar ishin ata që diskriminoheshin e luftonin për zbatimin e gjuhës shqipe. Sloganet mund të ndryshohen e të përdoren në varësi të interesave partiake, por shoqëria nuk ndryshon dot pa ndryshuar mendësia nacionaliste e etnocentriste.

Para këtij slogani Zaev u fut në skenë edhe përmes disa përgjimeve apo të ashtuquajturave “bomba”, ku publikoheshin përgjime të bisedave të personave zyrtarë që kanë përgatitur plane për montim rastesh ku viktimizoheshin shqiptarët.

Shqiptarët në regjimin e VMRO-së përballeshin me diskriminim dhe ishin viktima të rasteve të shumta që montoheshin në shtet. Prandaj për të depërtuar në kampin shqiptarë Zaev përdori këtë kartë të shpëtimtarit që do të krijojë “shoqëri për të gjithë”, dhe të zbardhë gjitha rastet e montuara politikisht, dhe shqiptarët të lirohen nga burgjet që qëndronin padrejtësisht.

Por, ishin dy premtime kryesore që më pastaj u kuptua që kishin qenë dy mashtrime me çka e hapi rrugën e tij për të ardhur në pushtet, ndërkaq rrugën e shpresës për shoqërinë e la të bllokuar për të mos u pastruar asnjëherë.

Kujtojmë se, Zaev erdhi në pushtet me votat e shqiptarëve ku arriti të bëhet më i besueshëm se sa vetë politikanët shqiptarë në kampin shqiptarë, duke marrë mbi 50 mijë vota shqiptare. Vota të cilat ishin vendimtare për fitoren e tij kundër partisë nacionaliste VMRO-DPMNE. Por kjo “formulë” e tij si duket rezultoi e suksesshme vetëm për sa kohë deri sa ishte në pushtet dhe u demaskua nga ata premtimet megalomane që i kishte dhënë e që nuk i ka realizuar.

Por tani që dështoi LSDM-ja pësoi humbje të madhe a do ta ndryshojnë sloganin nga “shoqëri për të gjithë” në “shoqëri për maqedonasit”, për të rikthyer votuesit maqedonas dhe për t’i treguar votuesit shqiptar se u ka skaduar afati dhe nuk kanë më nevojë për ata shqiptarët lojal ndaj LSDM-së.

Koncepti i njohur “shoqëri për të gjithë” i dështoi Zaevit dhe LSDM-së, pasi për shoqërinë maqedonase Zaev u shpall “tradhtar”, ndërkaq për shoqërinë shqiptare u shpall “mashtrues”, që vetëm shfrytëzoi votat shqiptare për të ardhur në pushtet, sërish trajtimi i shqiptarëve nga institucionet e vendit ishte po i ngjashëm me atë të qeverisjes së Gruevskit.

/ts