Qumështi brenda natës shtrenjtohet në Maqedoni..

Edhe çmimi i qumështit të paketuar ka shënuar rritje.
Qytetarët kanë theksuar për portalin Faktor se brenda natës kanë vërejtur rritje të çmimeve nëpër markete. Sipas tyre, çmimi arrin deri në 70 denarë për litër qumësht.

Rritja, siç thonë lexuesit e “Faktor”, është vënë re në disa markete të kryeqytetit dhe siç theksojnë ata, janë shqetësuar nga diferencat e mëdha të çmimeve në vetëm një ditë.

” Çdo ditë blejmë një tetrapaketë qumësht prej një litri, kryesisht për nevoja shtëpiake, në një prej marketeve më të mëdha në Shkup. Të mërkurën, me sa shoh unë, i gjithë qumështi ishte dukshëm më i shtrenjtë, madje edhe për njëzet denarë, ndoshta edhe më pak se 20 denarë, por në thelb të gjithë ishin më të shtrenjtë, nga prodhimet vendase e deri te ato turke, serbe dhe kroate, pa marrë parasysh yndyrën.

Nëse deri dje çmimi i qumështit ishte 55 denarë, tani çmimin e një litri tetrapake e kam paguar 68 denarë, kjo ishte një tronditje e madhe për ne — thotë Kuzman Atanasov nga Shkupi.

Njohësit e tregut theksojnë se rritja në shitje me pakicë nuk mund të jetë për shkak të rritjes së çmimit të qumështit që shesin fermerët, sepse blerja e qumështit të papërpunuar nga fermerët ende bëhet me çmime të njëjta, nga 11 deri në 18 denarë për litër qumësht.

” Edhe pse kostot e fermerëve po rriten për shkak se çmimet e plehrave janë rritur ndjeshëm, megjithatë çmimi me të cilin blihet qumështi nga fermerët është i njëjtë. Varësisht nga sasitë që ofrojnë fermerët, qumështi i tyre blihet me çmime duke filluar nga 11 denarë për litër.

Rritja e çmimeve me pakicë nuk vjen si pasojë e rritjes së kostove të blerjes së qumështit. Mendoj se rritja nuk justifikohet dhe shteti duhet të marrë mekanizma kontrolli për të ndalur rritjen marramendëse sepse kjo do të ndikojë shumë negativisht tek qytetarët”, thotë një këshilltar për bujqësi.i cili këmbënguli të mbetet anonim.

/Faktor.mk