Edhe në Kërçovë shkollat të boshatisura..! (VIDEO)

Oborret, korridoret dhe klasat e shkollave sot ishin të zbrazura. Nxënësit ishin paraqitur në orën e parë të mësimit, por duke parë se arsimtarët qëndronin në zyrë dhe nuk vinin në klasë ata u kthyen në shtëpi.

Zyrat e arsimtarëve ishin plot, të gjithë mësimdhënësit ishin mbledhur në zyrë dhe po mbanin grevë. Ata kërkojnë rritjen e rrogës dhe deri në plotësimin e kërkesave nuk do të mbajnë mësim.

“Vizituam disa nga shkolla në qytetin Kërçovës të cilat ishin të zbrazura dhe vetëm sallat e arsimtarëve ishin të mbushura, e ata ishin pjesëtar të sindikatës të cilët po mbajnë grevë për kërkesat tyre, realisht për plotësimin e kërkesave të tyre, klasat ishin të boshatisura, na thanë se disa nxënës kishin ardhur në mëngjes dhe më pas ishin kthyer kur e kishin parë se askush nuk po ju jepte mësim.

Në gjithë komunën e Kërçovës janë vetëm dy shkolla të cilat nuk po mbajnë grevë, por vetëm po solidarizohen me kolegët e tyre”, raporton Salije Sadiku, gazetare e TV21.

Profesori Arsllan Kadriu thotë se pagat e mësimdhënësve janë poshtë çdo niveli, siç pohon ai rrogë më modeste se e tyre nuk ka në asnjë sektor.

“Greva ka filluar në orën 7, të gjithë jemi pro grevës, d.m.th. nuk ka asnjë kundër sepse greva ka karakter ekonomik për pagat, sepse pagat tona janë poshtë çdo niveli, rroga më modeste thuajse nuk ka në asnjë sektor. Prej vitesh nuk është ngritur rroga, çështja qëndron gjithandej, pra nuk ka karakter politik por ekonomik”, tha Arsllan Kadriu, profesor.

Profesori Mirosllav Cvetanovski shpreson se Qeveria shpejt do t’i pranojë kërkesat e tyre, ngase siç tha ai kështu nuk është mirë për askënd e sidomos për nxënësit.

“Presim që Qeveria t’i plotësojë kërkesat tona, të shpresojmë për më të mirën sepse kështu për askënd nuk është mirë, ja hapësirat e shkollës janë të zbrazura, mirë është të ketë fëmijë, ja tani siç e shihni hapësirat janë të zbrazëta. Ishin në mëngjes në orën 7 disa nxënës e panë se nuk kishte kush tu mbante mësim dhe ikën”, pohoi Mirosllav Cvetanovski, profesor.

Gati në të gjitha shkollat greva u zhvillua në dy ndërrime. Grevistët janë të vendosur se nuk do të japin mësim deri në momentin e plotësimit të kërkesave të tyre, gjegjësisht rritjen e rrogës. Grevë nuk u mbajte në dy shkolla të Kërçovës, në SHF “Rexh Rushit Zajazi” dhe SHF “Vlladimir Polezinovski”. Arsimtaret e këtyre shkollave nuk janë pjesë të sindikatës.

VIDEO:

/tv21