Kërçovë nuk ka interes për vaksinim..(VIDEO)

Karvani i Ministrisë së Shëndetësisë për vaksinim arriti në Kërçovë, por ata që u imunizuan mund të numërohen me gishtat e dorës. Vetëm 6 persona u paraqitën për ta marrë dozën e tretë, ndonëse gjatë gjithë ditës ekipi shëndetësorë ishte në qendër të Kërçovës.

“Karvani i Ministrisë së shëndetësisë për vaksinim masiv sot po qëndron në Kërçovë, në këtë qytet interesimi ka qenë tejet por tejet i ulët, nuk dihen arsyet nëse është për shkak të fillimit të muajit të Ramazanit është për shkak të kohës së ftohët apo është sepse njerëzit tanimë janë liruar dhe nuk frikësohen nga Covid-19”, raporton Salije Sadiku, gazetare TV21.

Njerëzit vinin, pyesnin se çfarë po ndodh dhe largoheshin. Shumica ishin të vaksinuar me 2 doza, por që nuk donin ta merrnin edhe të tretën.
Në fillim kur Maqedonia u furnizua me vaksina qytetarët prisnin radhë të gjata për tu vaksinuar. Tani që karvani po shkon nga qyteti në qytet askush nuk është i interesuar të vaksinohet, edhe pse lufta me pandeminë ende nuk ka përfunduar.

Drejtori i Shtëpisë së Shëndetit, Xhabir Bajrami, tregon se në Kërçovë me dy doza janë vaksinuar 25 mijë qytetarë, ndërsa sa i takon mosinteresimit të sotëm për karvanin e vaksinimit, tha se ndoshta moti i keq nuk i lejon qytetarët dalin.

“Punkti çdo ditë vazhdon në kuadër të shtëpisë së shëndetit, sot është një kampanjë masive në qendër të qytet që të kalojnë qytetarët dhe t’u tërhiqet vëmendja dhe të kthehen të vaksinohen, sepse kemi raste sidomos tek të sëmurët me sëmundje kronike të cilët janë vërtetë vështirë e kalojnë edhe pse janë me dy doza vaksine është tepër e rëndësishme doza e tretë e vaksinimit”, tha Xhabir Bajrami, drejtor i Shtëpisë së Shëndetit.

Autoritetet shëndetësore në vazhdimësi përsërisin se virusi korona ende është i pranishëm dhe se pandemia ende nuk ka përfunduar, andaj edhe Ministria e Shëndetësisë ka vendosur të shkojnë në 14 qytete për vaksinim e popullatës. Bazuar në të dhënat e fundit rreth 41% e popullsisë së përgjithshme në Maqedoninë e Veriut janë vaksinuar me dy doza dhe vetëm 7% janë vaksinuar me dozë përforcuese.

VIDEO:

/tv21