Lufta Rusi-Ukrainë: Ja çka ndodhi sot atje..
Presidenti ukrainas, Volodymyr Zelensky i është drejtuar Parlamentit italian përmes video-lidhjes.
Ai u ka thënë deputetëve italianë se shteti i tij është në prag të mbijetesës së luftës me Rusinë dhe ka paralajmëruar se Moska dëshiron të depërtojë në pjesën tjetër të Evropës, shkruan Alsat.
“Për trupat ruse, Ukraina është porta e Evropës, ata duan të hyjnë brenda, mirëpo barbarizmi nuk duhet të depërtojë”, tha Volodymyr Zelenski, President i Ukrainës.
Pas disa ditësh luftime, forcat ukrainase kanë rikthyer kontrollin e Makarivit, qytezë rreth 50 kilometra në perëndim të Kievit, kanë thënë Forcat e Armatosura të Ukrainës përmes një postimi në Facebook. Makariv ka pësuar dëme të mëdha nga sulmet e vazhdueshme ajrore të Rusisë.
Ekipet shtetërore të emergjencës në Ukrainë kanë thënë se gati 1,000 ndërtesa janë shkatërruar si pasojë e bombardimeve ruse në qytetin Harkiv. Shumica prej tyre kanë qenë ndërtesa banimi. Forcat ruse kanë bombarduar vazhdimisht Harkivin, i cili gjendet 50 kilometra larg kufirit me Rusinë.
Të paktën 500 civilë janë vrarë aty, kanë thënë zyrtarët ukrainas. Zyra e Prokurorit të përgjithshëm në Ukrainë tha se së paku 117 fëmijë janë vrarë dhe mbi 155 të tjerë janë plagosur qëkur Rusia ka nisur pushtimin, shumica prej tyre në ose rreth Kievit në qytetin verilindor të Harkivit.
Ambasada amerikane në Kiev, ka thënë se, sipas Ministrisë së Jashtme ukrainase, forcat ruse kanë dërguar 2,389 fëmijë ukrainas nga rajonet Donjeck dhe Luhansk për në Rusi.
Ministria britanike e Mbrojtjes ka thënë se forcat ruse duket se kanë “ngecur në vend” për shkak të avancimit të kufizuar. Në një postim në Twitter, është thënë se forcat ukrainase kanë vazhduar që të “zmbrapsin” tentimet ruse për të marrë kontrollin e Mariupolit një nga qytetet ku është luftuar më së shumti prej shpërthimit të luftës.
Nga ana tjetër Ministria ruse e Mbrojtjes shpërndau më shumë pamje të helikopterëve të tyre sulmues Ka-52 në Ukrainë. Zëdhënësi i këtij dikasteri tha se kanë “shkatërruar nëntë tanke ukrainase.
“Një grup ‘gjuetarësh nate’ i përbërë nga helikopterë Ka-52 dhe Mi-28 kanë shkatërruar nëntë tanke ukrainase”, tha Igor Konashenkov, zëdhënës i Ministrisë së Mbrojtjes së Rusisë.
Humbjet ruse në Ukrainë llogariten në rreth 15 mijë ushtarë. Lajmi është bërë i ditur nga pala ukrainase, ndërsa shton se këto janë shifra mjaft të larta dhe që rëndojnë shumë mbi ushtrinë e Putin.
Përderisa në fronte vazhdojnë luftimet, qytetarët në forma të ndryshme po ndihmojnë ushtarët. Një teatër në Ukrainën perëndimore është shndërruar në një kuzhinë vullnetare ku aktorët dhe stafi i prapaskenës bëjnë ushqim për ushtarët dhe njerëzit e zhvendosur nga luftimet.
“Ka një thënie që kur tingëllon armët, muzat heshtin, por ne nuk heshtim”, u shpreh Alla Shkondina, Aktore.
“Gjatë kësaj periudhe kemi bërë mbi 3 mijë qofte, 150 kg lakër të zier me mish 2 mijë petulla. Tani kemi vendosur të bëjmë më shumë ushqim me proteina, si mishi”, theksoi Mykola Hnatenko, Drejtor i Teatrit.
Refugjatët ukrainas që mbërritën në qytetin kufitar polak të Medyka thanë se qytete si Mariupol dhe Kharkiv kishin pësuar dëme të mëdha nën bombardime të vazhdueshme.
“Gjatë pesë ditëve të fundit, aeroplanët fluturonin mbi ne çdo 5 sekonda dhe hidhnin bomba kudo. Ishte e tmerrshme dhe ne rrezikuam dhe u larguam”, tha Viktoria Totsen, Refugjate ukrainase.
“Ata çdo ditë bombardojnë, 40, 50, 60 herë në ditë. Ata bombarduan periferi dhe qendrën e qytetit. Dëmtuan qendrën e kulturës, dëmtuan arkitekturën antike”, u shpreh Olena Almazova, Refugjate nga Kharkiv.
Agjencia e OKB-së për refugjatët thotë se më shumë se 3.5 milionë njerëz janë larguar nga Ukraina që nga pushtimi i Rusisë, duke kaluar një tjetër moment historik në një eksod që ka çuar në krizën më të keqe të refugjatëve në Evropë që nga Lufta e Dytë Botërore.
/ Alsat.mk
