Pse Zvicra është e rëndësishme për Rusinë..

Zvicra zyrtarisht është në mesin e dhjetë investitorëve kryesorë në Rusi, referuar të dhënave të siguruara nga administrata federale. Në të njëjtën kohë, sipas ambasadës në Moskë, Zvicra ka qenë destinacioni kryesor për rusët e pasur prej vitesh kur bëhet fjalë për menaxhimin e pasurisë së tyre, transmeton albinfo.ch.

Bazuar në shifra, në vitin 2020 qytetarët e Federatës Ruse transferuan 2.5 miliardë dollarë në Zvicër – shuma më e lartë në pesë vjet.
Por pse Zvicra është e rëndësishme për Rusinë? Pikërisht se Zvicra luan një rol kyç për Rusinë në tregtinë e mallrave.

Thuhet se 80% e tregtisë ruse kalon nëpër Gjenevë, Cyrih, Zug dhe madje edhe Lugano.
Vlen të theksohet se shumica e kompanive dhe institucioneve ruse kanë një degë në Zvicër.

Nord Stream 2, për shembull, ka selinë e saj në Zug. Kompania është një degë e kompanisë publike ruse Gazprom.
Nga ana tjetër, vlera e investimeve zvicerane në Rusi në fund të qershorit 2021 ishte 17.6 miliardë dollarë, sipas Bankës Qendrore Ruse.

Një shumë e barabartë me 3.1% të totalit të investimeve të huaja në vend.
Ndërkaq eksportet zvicerane në Rusi referuar të dhënave nga Zyra Federale e Statistikave – arritën në 2.8 miliardë franga në vitin 2020.

/Albinfo.ch