Bekteshi: Tani jetojmë në një nga krizat më të mëdha ekonomike botërore..

Për shkak invazionit të Rusisë në Ukrainë dhe krizës ekonomike botërore, nga sot e deri më 20 mars Qeveria e Maqedonisë ka ndaluar eksportin e disa drithërave dhe produkteve tjera.

Ministri i Ekonomisë Kreshnik Bekteshi thotë se qëllimi i kësaj mase, e cila do të zgjasë 10 ditë është mbrojtja e tregut dhe prodhimit vendor.

“Grurë dhe thekër, elb, misër, miell nga gruri dhe thekuri, farë luledielli, vaj nga fara e lulediellit. Duke marrë parasysh invazionin e Rusisë në Ukrainë dhe reperkusionet që në një situatë të këtillë janë jo vetëm për tregjet evropiane, por edhe ato botërore, mund të them se tani jetojmë në një nga krizat më të mëdha ekonomike botërore”, tha Kreshnik Bekteshi, minister I Ekonomisë.

Bekteshi tha se nëse paraqitet nevoja, shteti është i gatshëm të plotësojë rezervat e mallrave, por për momentin nuk ka nevojë për këtë, duke siguruar se shteti ka rezerva të mjaftueshme të drithërave.

“Gjithsesi kur të kemi sasi të mjaftueshme, siç kemi edhe tani për atë është edhe masa, do të lejojmë eksport, por më e rëndësishmja është që tregtarët dhe prodhuesit ta dinë se të gjitha këto masa, këto 400 milionë euro që i jep qeveria janë mjete të qytetarëve me qëllim që të mos ketë tronditje të çmimeve nga ana e prodhimtarisë vendore, nga ana e tregtarëve të mëdhenj për këto produkte”, pohoi Kreshnik Bekteshi, minister I Ekonomisë.

Por me këto 10 ditë sa do të kursejë Maqedonia e Veriut dhe kur duhet të aktivizohen rezervat? Sekretari shtetëror pranë Ministrisë së Bujqësisë Trajan Dimkovski thotë se rezervat vihen në funksion kur ka çrregullim më të mëdha të tregut.

“Në pjesën e rezervave të mallrave ato kanë rolin e mbajtjes së balansit në mes të kërkesës dhe ofertës, konkretisht në këtë rast bëhet fjalë për grurin, që e shohim si produkt bazë në ushqim, ku më së shumti përdoret, deri në këto momente nuk ka nevojë për aktivizimin e rezervave të mallrave, sepse kemi mjaftueshëm nëpër mulli”, tha Trajan Dimkovski, sekretari shtetëror i Bujqësisë.

Asnjë nga tregtarët nuk do të ketë humbje nga vendimi për kufizimin e marzheve, marrë parasysh që kostot operative njihen në formimin e çmimin dhe jemi konsultuar me Odat Ekonomike, tha Bekteshi. Vetëm për tre produkte nuk do të kenë fitim dhe nuk ka asnjë supermarket apo treg që ka nën 300 – 400 produkte, shton ai.

VIDEO:

/tv21