Ukrainë, fëmijët të tmerruar nga shpërthimet..

Në librarinë Ivanychuk në Lëvov të Ukrainës, ku në ditë të zakonshme mbizotëron qetësia, sot dëgjohej himni që dukej sikur sfidonte ushtimën e shpërthimeve nga sulmet ruse që ndodhin disa qindra kilometra nga aty, shkruan Alsat.

Dhjetëra vullnetare, në krye të të cilave ishte drejtoresha e bibliotekës, ishin mbledhur në dhomën e vogël në katin e dytë të librarisë për të ndërtuar rrjetë kamuflimi për ushtrinë ukrainase.

Qytetarë të shumtë vinin e shkonin duke sjellë veshje të vjetra, materiali i të cilave përdorej për krijimin e rrjetave të kamuflimit. 20 rrjetat e krijuara më pas do t’i dërgoheshin ushtrisë.

“Fillimisht kemi materialin baze të cilin e presim me në formë të rripave që më pas i përdorim për të bërë rrjetat që kemi këtu. Me pas rripat nga materiali tjetër i presim dhe i lidhim tek rrjeta për të përfunduar procesin. Më pas rrjetat janë gati dhe mund të përdoren nga ushtarët tanë për të fshehur pajisjet”, tha Natalia Kukhta, mësuese e anglishtes.

Një mijë kilometra nga Lëvov dhe vetëm 20 kilometra nga kufiri me Rusinë, në qytetin e Harkovit bombardimet ruse sa shkojnë e intensifikohen. Nga një strehë mbrojtëse kundër bombardimeve, me poçet e llambave që lëshohen nga tavani e muret e palyera dëgjohen të qarat e dhjetëra foshnjave, që spitali lokal i zhvendosi aty për t’i mbrojtur.

Për dallim nga foshnjat që nuk dinë çfarë ndodh jashtë, këta fëmijë që 5 ditë me radhë janë ngujuar në bodrumin e shtëpisë, tmerrohen sa herë që dëgjojnë shpërthime. Nëna e tyre Ekaterina Babenko thotë se çdo orë po e kalojnë me frikë.

“Shoqja ime që jeton në periferi të Gorizontit, disa orë më parë u godit shtëpia ngjitur me të dhe u shkatërruan disa kate dhe për disa kohë nuk kishte asnjë lidhje me të, ishin minuta të frikshme, shumë të frikshme”, deklaroi Ekaterina Babenko.

Ushtria ruse ka mohuar vazhdimisht se ka shënjestruar zonat e banuara, pavarësisht dëshmive të bollshme të bombardimeve të ndërtesave të banimit, shkollave dhe spitaleve.

/Alsat.mk