Vuçiç urdhëroi ushtrinë e policinë të jenë gati..

Në reagimin e tij të parë pas zhvillimeve në Ukrainë, presidenti i Serbisë Aleksandar Vuçiç ka thënë se situata e tensionuar dhe njohja e dy rajoneve, mund të ndikojë negativisht edhe në Ballkanin perëndimor.

Ai ka urdhëruar ushtrinë dhe policinë të jenë në gatishmëri.
Vuçiq tha se do të përballet me presione nga vendet perëndimore për të vendosur sanksione ndaj Rusisë.

Ndërkohë, Kremlini ka njoftuar se në ditët në vijim këshilltari i sigurisë në Moskë, do të vizitojë Serbinë.
“Pas seancës së Këshillit të Sigurisë Kombëtare i dhashë urdhër ushtrisë, si komandant suprem, që të përgatitet në mënyrën më të mirë të mundshme në çdo kohë.

Ne vazhdojmë të blejmë atë që është më e mira për mbrojtjen e vendit. Sot, ju shihni në botë se paqja nuk është më diçka e nënkuptuar”, tha Aleksandar Vuçiq, President i Serbisë

Ish ministri i jashtëm i Kosovës Enver Hoxhaj kërkoi që Kuvendi të miratojë rezolutë për tensionet në Ukrainë. Ai dhe deputeti i VV-së Haki Abazi kërkuan mbledhje të këshillit të Sigurisë

“Ukraina është fronti i parë Ballkani është fronti i dytë dhe ne jemi vija e parë e këtij fronti të dytë në Ballkan dhe mendoj se Qeveria duhet ta mbledhë Këshillin e Sigurisë Kombëtare”, Enver Hoxhaj, PDK

“Duke pasur një fqinj si Serbia që po ashtu përdor taktikat e njëjta të kërcënimit të integritetit territorial dhe shpesh herë kopjon metodën e Rusisë, është urgjente që Institucionet e tona të sigurisë të mblidhen dhe të shqyrtojnë e monitorojnë situatën me të cilën jemi duke u ballafaquar”, tha Haki Abazi, Vetëvendosje

Në seancën ku deputetët kërkuan vëmendjen e Qeverisë sa i përket situatës në Ukrainë, kryeministri i Kosovës Albin Kurti tha se Qeveria mbështetë sovranitetin e pavarësinë e Ukrainës dhe do të jetë përherë e bashkërenduar me SHBA-në, BE-në e NATO-n.

“Padyshim, që mbështet sovranitetin pavarësinë dhe integritetin territorial të Ukrainës dhe sikurse deri më tani edhe në vijim do të jemi përherë të bashkërenduar me BE-në, SHBA-në dhe NATO-n”, tha Albin Kurti, Kryeministër i Kosovës

Ministrja për Evropë dhe Punë të Jashtme e Shqipërisë, Olta Xhaçka, ka thënë se ky vendim përbën shkelje të ligjit ndërkombëtar, sovranitetit dhe integritetit të Ukrainës, si dhe marrëveshjeve të Minskut që lidhen me lindjen e Ukrainës.

Kryeministri kroat, Andrej Pllenkoviq, ka thënë se Kroacia dënon vendimin e Rusisë për të njohur pavarësinë e rajoneve Donjeck dhe Luhansk, vendim që sipas tij shkel ligjin ndërkombëtar.

/alsatm